O CONCELLO DE MONFORTE QUERE RECUPERAR OS FOGOS DO RÍO NA ZONA DE A PINGUELA

O 22 de maio, o Goberno local solicitou autorización para retomar este evento que se viña celebrando o día 16 de agosto, dentro das Festas Patronais. O espectáculo de lumes artificiais tería lugar na coñecida como Illa da Pinguela, na zona das dúas pasarelas entre Carude e Cobas. O Concello escolleu este punto por ser o máis próximo ao casco urbano e que garante a distancia de seguridade imprescindible respecto ás edificacións máis cercanas. Dende o Concello de Monforte lembraron que este espazo conta cunha nova visibilidade grazas aos traballos da segunda fase do Paseo do río Cabe, que esperan completar antes de mediados de xuño. O Goberno local suliñou que esta obra «estratéxica», na que se investiron 3,5 millóns de euros, foi posible grazas «á capacidade de xestión e diálogo do Goberno local con outras administracións», na procura de importantes achegas económicas para custear o proxecto.•