A xornada do 17 de maio encheu Quiroga de cultura e lecer. O Día das Letras Galegas celebrouse na capital comarcal con diversos actos, que tiveron como escenario o Auditorio Municipal e o Museo Etnográfico. O domingo pola tarde, tivo lugar unha recepción aos representantes dos colectivos culturais da vila, na sala de catas do Museo Etnográfico. A continuación, o Auditorio acolleu un acto de homenaxe ao Gaiteiro da Ermida, Colomán González Rodríguez, pola súa labor na transmisión do patrimonio etnográfico da comarca quiroguesa. Este evento contou coa participación do Grupo de Gaitas O Recanto, a Banda de Gaitas San Martiño, Os Gaiteiros da Ermida, o Grupo de Danza «Arume da Queiruga» e o musicólogo e Director da Real Banda de Gaitas e da Escola de Gaitas da Deputación de Ourense, Xosé Lois Foxo.
