• O Concello de Ribas de Sil desenvolveu unha ampla programación cultural para celebrar o Día das Letras Galegas. A xornada comezou cunha sesión de contacontos e maxia na Biblioteca Municipal, co espectáculo «Conto Contigo». A continuación, o Salón de Actos do Concello acolleu o concerto ofrecido polo alumnado da Escola Municipal de Música, que deleitaron ao público asistente co seu bo facer musical.
Houbo espazo tamén para o teatro nesta xornada. O grupo local Augas do Sil puxo en escea as obras «O testamento do tío Nacho», e «Dos ovos para cear», cun patio de butacas ateigado de público.
A xornada rematou cunha actuación da Banda Folk do Concello de Ribas de Sil na Praza do Concello.
Estes actos serviron tamén para rendir homenaxe a Pablo Vidal, recentemente falecido, en memoria da súa labor como fotógrafo e recopilador gráfico de todo o que tivera relación coa súa terra.•
