A sección de Sarria da Escola Oficial de Idiomas de Lugo incorpora o vindeiro curso o nivel avanzado de inglés

O curso 2015-2016, a Sección de Sarria da Escola Oficial de Idiomas de Lugo vai incorporar o nivel avanzado de inglés. No curso que agora finaliza, o centro ofreceu ensinanza do idioma inglés en nivel básico, con dous grupos de nivel 1 e dous grupos de nivel 2. Tamén dispuxo de nivel intermedio, con tres grupos de nivel 1 e dous grupos de nivel 2. As clases impártense nas aulas do IES Gregorio Fernández, de luns a venres en horario de tarde. Para saber en que nivel é conveniente matricularse, as persoas interesadas poden realizar unha proba de clasificación, que lles permitirá aproveitar o que xa saben de inglés e inscribirse no nivel máis axeitado para seguir adiante coa súa formación lingüística. Toda a información está dispoñible no web www.edu.xunta.es/centros/eoilugo, ou no propio IES Gregorio Fernández de Sarria.•