•Entre as novidades, a Ruta do Viño da Ribeira Sacra inclúe unha visita ao Mosteiro de Santo Estevo de Ribas de Sil •A oferta estrela será o Tren do Peregrino, que sairá dende Madrid ata Santiago, pasando por Monforte

• Dende o 21 de maio están á venda os billetes para viaxar nos trens turísticos da campaña Galicia A Todo Tren, unha iniciativa posta en marcha por Turismo de Galicia en colaboración con Renfe, e que xa vai pola súa terceira edición.

O CAMIÑO DE SANTIAGO A BORDO DUN CONFORTABLE TREN HOTEL
Ademais das sete rutas do pasado verán, este mes estrearase o Tren do Peregrino, que posibilita a realización do Camiño de Santiago dende Madrid a bordo dun confortable tren hotel, dotado con aloxamento de cabina gran clase, e restauración no propio convoi. As saídas do Tren do Peregrino terán lugar os días 6, 13, 20 e 27 de agosto e realizarán o percorrido Madrid-Astorga-Ponferrada-Monforte de Lemos-Ourense-Santiago-Madrid. Según explicou a directora de Turismo de Galicia, Nava Castro, na presentación desta campaña, con esta nova proposta os pasaxeiros poderán realizar diferentes etapas do Camiño de Santiago a pé ou en bicicleta, ou ben coñecer as diversas cidades nas que estaciona o tren con visitas guiadas e outras actividades.

TREN DOS BALNEARIOS: ESTANCIAS TERMAIS PARA MAIORES DE 50 ANOS NA PROVINCIA DE OURENSE
Outra das novidades da programación de Galicia A Todo Tren para este verán é o Tren dos Balnearios, unha nova oferta dirixida a maiores de 50 anos que brindará a posibilidade de aloxarse durante 6 días, en réxime de pensión completa, nos balnearios ourensáns de Laias, Carballiño, Arnoia, Baños de Molgas ou Lobios, e realizar circuítos culturais pola zona elixida, podendo chegar á cidade de Ourense en tren desde 30 cidades españolas. Esta nova iniciativa contou coa colaboración da Deputación de Ourense.

NOVIDADES NAS RUTAS DOS TRENS DOS VIÑOS
A terceira edición de Galicia A Todo Tren continúa ofrecendo sete rutas que permiten descubrir diferentes zonas de Galicia con variadas temáticas. Os viaxeiros poderán escoller entre a Ruta dos Faros, a Ruta dos Pazos e Xardíns Históricos, e as cinco Rutas do Viño que percorrerán os territorios onde das denominacións vitivinícolas galegas. Nava Castro destacou que para esta nova edición, os itinerarios foron mellorados “incrementando aínda máis o seu atractivo”. Entre outras novidades, a Ruta do Viño de Monterrei inclúe este verán a visita ao Castelo de Monterrei, onde os turistas poderán realizar o Túnel do Viño e vivirán un espectáculo sorpresa. Pola súa banda, nas rutas do viño Ribeiro e Rías Baixas, se realizará unha visita ao Centro de Interpretación do Viño e a Lamprea de Arbo e ao Mosteiro de San Clodio. Asimesmo, a ruta da Ribeira Sacra incorpora como novidade a visita ao Mosteiro de Santo Estevo de Ribas de Sil.
Cada unha das rutas pódese realizar nun día e, ademais da viaxe en tren, o programa ofrece servizo de guía especializado durante todo o percorrido, traslados complementarios en autocar, entradas a todos os puntos de interese e actividades.
Tamén chegará a Galicia un verán máis o Tren Al Andalus, o tren de luxo máis amplo e espazoso do mundo, que percorrerá en xullo durante 5 días o Camiño de Santiago, con saída desde León e destino Santiago de Compostela.•