• O vindeiro curso porase en marcha o programa «Protexendo o Camiño», unha iniciativa da Consellería de Cultura, Educación e Ordenación Universitaria en colaboración con Turismo de Galicia que chegará a 40 centros educativos dos concellos polos que pasan as diferentes rutas xacobeas.
Os responsables da Xunta deron a coñecer os detalles deste proxecto, que trata de fomentar o coñecemento do Camiño de Santiago entre os máis cativos. A actividade está protagonizada por un neno e unha nena, Iago e Peregrina, debuxante e fotógrafa, que realizan o Camiño de Santiago tentando protexer as rutas dos riscos que poden sufrir os nenos. Ao longo das súas aventuras, os protagonistas reflexionan, dun xeito lúdico, sobre a responsabilidade de toda a comunidade coma protectores do Camiño. Ademais, identifican os riscos existentes e propoñen posibles solucións a estes problemas.
Durante cada acción, os nenos escoitan contos, debuxan e fan diversas actividades e postas en común para entre todos artellar unha rede protectora e cultural do Camiño de Santiago. Os escolares vanse familiarizar, dun xeito lúdico, co Camiño de Santiago, para poder valorar o seu poder cultural, económico, patrimonial e social.•
