O paro baixou en maio en todas as comarcas do sur de Lugo

A comarca chantadina rexistrou o descenso máis importante, cun 9,02% menos de desemprego respecto a abril

O sur de Lugo segue a rexistrar outro mes máis cun descenso do número de desempregados nas comarcas de Chantada, Sarria, Quiroga e Lemos. Arquivo EC.
O sur de Lugo segue a rexistrar outro mes máis cun descenso do número de desempregados nas comarcas de Chantada, Sarria, Quiroga e Lemos. Arquivo EC.

• O mes de maio continuou coa tendencia á baixa do desemprego no sur lucense. A porcentaxe máis significativa rexistrouse na comarca de Chantada, que contabilizou un descenso do 9,02% do desemprego, cun total de 766 parados a final de maio. Pola súa banda, a comarca de Lemos contabilizou un 4,55% menos de paro, o que sitúa a cifra de desempregados en 2.200. A continuación, cabe destacar o descenso do paro nun 4,18% na comarca de Quiroga, que rematou maio con 412 desempregados. Na de Sarria a baixada foi do 3,01%, co que a cifra de parados a 31 de maio era de 1.514.

En canto á provincia de Lugo, o paro en maio baixou en 1.056 persoas, o que supón un 4,39% menos que en abril, e deixa en 22.983 a cifra de demandantes de emprego. Na comparativa autonómica, a provincia de Lugo rexistrou a maior baixada porcentual do paro, cun 4,39% menos de desempregados que en abril, seguida por Ourense, onde a caída foi do 3,42%, A Coruña, con 2,79% menos de paro, e por último Ourense, cun 2,56% menos de desempregados rexistrados.

PARO EN CHANTADA

O municipio de Chantada rexistrou a baixada de paro máis importante na súa comarca, cun 9,55% menos, situándose con 521 desempregados en maio. En Taboada, o paro descendeu nun 9,21%, o que supón 138 parados a finais de maio. Por último, a caída do desemprego en Carballedo foi do 6,15%, cun total de 107 persoas desempregadas.

COMARCA DE LEMOS

No conxunto dos municipios de Terra de Lemos, o mellor rexistro porcentual correspondeu á Pobra do Brollón, onde o paro baixou un 7,62%, deixando o número de desempregados en 109. No Saviñao, a caída foi do 6,45%, acabando maio con 232 parados, mentres que en Pantón foron 153, un 5,55% menos que en abril. Pola súa parte, Monforte completou o mes de maio con 1.489 desempregados, un 4,55% menos que o mes anterior. En canto a Bóveda e Sober, os cambios foron pouco significativos, con 81 parados no primeiro municipio, un menos que en abril, e 136 desempregados no segundo, un máis que no mes anterior.

COMARCA DE QUIROGA

O municipio de Quiroga rexistrou 270 parados a finais de maio, o que supón unha baixada do 5,92% respecto ao mes anterior. En Folgoso, o descenso foi do 3,63%, deixando o número de parados en 53. En canto a Ribas de Sil, completou o mes con 186 desempregados, un máis que en abril.

O PARO EN SARRIA

Na comarca sarriana, destaca a baixada porcentual dun 11,1% en Triacastela, con 32 parados a finais de maio. Pola súa banda, o descenso foi do 7,93% en Paradela, que completou o mes con 58 desempregados. A cifra de parados no Incio era de 77 a 31 de maio, un 7,22% menos que en abril. En Samos, a baixada porcentual tamén foi importante, con 7,14% menos de paro, situando a cifra final en 65 desempregados. No municipio de Sarria, maio rematou cun descenso dun 2,65% no paro, con 1.062 desempregados a 31 de maio. Pola súa banda, Láncara contabilizou unha lixeira subida do paro dun 1,85%, con 165 demandantes de emprego a finais de maio. Por último, O Páramo tivo un 1,78% menos de paro en maio, acabando o mes con 55 desempregados rexistrados.

Deixa unha resposta

Your email address will not be published.

Nova Anterior

Máis de 5.000 persoas de España e do estranxeiro interesáronse polo Campus de Lugo en tan só unha semana

Seguinte Nova

O Centro do Viño de Monforte consolídase como centro dinamizador e de promoción enoturística

Últimas noticias sobre ECONOMÍA

     
A %d blogueros les gusta esto: