• A mediados deste mes, a Sección Sindical de CIG-Saúde do Hospital Comarcal de Monforte denunciou «o deterioro que está a sufrir a sanidade» na área sur de Lugo. Según denuncia este colectivo, o Centro de Saúde de Monforte tiña a mediados de xuño catro baixas de médicos por motivos diversos, e das que só se cubriu unha a tempo completo. As consecuencias desta situación son, según CIG-Saúde, o peche de axendas durante un día, e ao seguinte se repartan os pacientes entre o resto dos médicos, «co que isto supón de descontrol para facultativos e enfermos». Ademais, hai que sumar outras cinco baixas en enfermería, das que só se está a cubrir unha a tempo completo e outras dúas a tempo parcial. Dende o sindicato denuncian «a merma que isto supón na atención prestada, xa que o centro podería permanecer pechado e os efectos serían praticamente os mesmos».
Esta situación, unida á recente supresión de dúas prazas de facultativo en Escairón e A Pobra, «dá unha idea da importancia que o Sergas outorga á Atención Primaria». «Todo o mundo sabe que canto máis se deteriore o servizo prestado en Atención Primaria, máis saturación se produce nos servizos de urxencia especializada».
Dende CIG-Saúde denunciaron que o Sergas está a dispensar «un trato moi semellante á Atención Primaria que á Especializada», co peche da pranta de Medicina Interna do Hospital de Monforte, o que suporá 28 camas menos, «co único motivo de aforrar os custes de contratación».
Por todo isto, dende CIG-Saúde esixen a dimisión do Xerente da Estrutura Organizativa de Xestión Integrada de Lugo, «xa que dende o seu nomeamento non fixo máis que empeorar a atención sanitaria, non tendo en conta nin a Atención Primaria nin ao Hospital Comarcal, que deben supoñer para el un molesto grano que se pode extirpar e esquecer inmediatamente.»•
