A Pobra do Brollón aposta pola ambientación de época no entorno natural do campo da feira
• A Pobra do Brollón segue a reivindicar a súa singular historia coa celebración da II Feira Medieval Guímara. O sábado 11 de xullo, o campo da feira de A Pobra acollerá esta nova edición dun evento marcado pola ambientación de época e a paisaxe natural na que se desenvolve a xornada festiva.
ALGO MÁIS QUE UNHA FEIRA MEDIEVAL
Pero esta feira non pretende ser un evento máis de inspiración medieval, senón que afonda nas raíces da liberdade dos pobos, e na importancia de conservar as tradicións e a identidade. A Feira de A Pobra trata de recrear a revolta dos guímaros, episodio acontecido hai quinientos anos, que se levantaron fronte ao Conde de Lemos e as súas forzas militares para frear os abusivos tributos cos que sometía á poboación local. En memoria deste punto de inflexión na historia deste pobo, a Feira Medieval Guímara dramatiza con figurantes locais a escea do enfrontamento dos guímaros, armados somentes coas ferramentas da labranza, cos lustrosos cabaleiros que servían ao Conde de Lemos.
MÚSICA, ARTESANÍA E A ESCEA DA REVOLTA GUÍMARA POLA MAÑÁ
A II Feira Medieval Guímara arrincará ás 11 da mañá, coa apertura dos postos e a lectura do pregón, a cargo do arqueólogo Xurxo Ayán. Ás 12 horas, terá lugar o acto central da celebración, coa posta en escea da Revolta Guímara, dramatizada por veciños e veciñas de A Pobra. A xornada continuará ás 12,30 coas demostracións dos oficios tradicionais nos diversos postos instalados. Ao mesmo tempo, desenvolverase unha exhibición de cetrería a cargo de Falcóns Galicia. A música percorrerá o campo da feira de A Pobra á unha do mediodía, cos pasarrúas a cargo do grupo de gaitas Aires da Poxa.
XOGOS TRADICIONAIS E MÚSICA Á TARDE
A xornada da tarde ofrecerá diversas actividades, tamén no campo da feira. Ás cinco terá lugar unha segunda volta das demostracións dos oficios tradicionais a cargo dos artesáns presentes na II Feira Medieval Guímara.
Tamén haberá un espazo para os máis novos, no que poderán achegarse aos modos antiguos de entender o tempo libre. Así, a partir das sete da tarde comezará unha sesión de xogos tradicionais, a cargo da firma Xotramu.
A música servirá para pechar a xornada. Ás nove, comezará a actuación do grupo Troula Animación, que ofrecerá un espectáculo de percusión e zancudos. O fin de festa comezará ás once, co Bruxo Queimán e Andrea Pousa, presentando «Soños dunha terra».•
