•O programa da Feira Tradiciona Outrora incorpora este ano a I Concentración-Exhibición de Bicicletas Antigas •O ilustrador de Bóveda Rubén Carral Fajardo gañou o IV Concurso de Carteis desta edición
• O vindeiro 14 de xullo, Bóveda celebrará a XIII Feira Tradicional Outrora en Rubián, que se está a consolidar como un dos eventos etnográficos máis salientables da nosa provincia. A Feira comezará ás dez e media, coa apertura dos expositores, e os diferentes artesáns iniciarán as sesións de exhibición dos diversos oficios tradicionais representados na Feira.
CELEBRACIÓNS DA MAÑÁ, COA CONCENTRACIÓN DE BICICLETAS ANTIGAS
Ás once e media actuará o Grupo de Danza Tradicional do Concello de Bóveda, e unha hora comezará a demostración da Asociación de Fiandeiras Bolboreta. Xa á unha menos cuarto, a Banda de Gaitas Municipal de Bóveda amenizará o campo da Feira de Rubián cun pasarrúas, que servirá de preludio ao novo evento desta celebración. Ás 13,00 horas terá lugar a I Concentración-Exhibición de Bicicletas Antigas, que organiza o Concello de Bóveda en colaboración coa Asociación de Veciñ@s A Lagoa de Rubián, e a Asociación Nacional de Bicicletas Antiguas y Clásicas.
ACTIVIDADES PARA OS MÁIS CATIVOS NA FEIRA OUTRORA
A actividade continúa na tarde do martes 14 de xullo, cunha ampla axenda de actos. O público infantil vai ser o protagonista a partir das catro, coa celebración de varios obradoiros para nenos e nenas. Ás cinco e media terá lugar a actuación do Mago Carlos, e ás seis e media dará comezo a Festa da Espuma. A actividade lúdica continuará ás sete e cuarto, cunha sesión de tiro con arco aberta ao público asistente.
DEMOSTRACIÓNS, CINE TEMÁTICO E MÚSICA POLA TARDE
Os visitantes que non acudiran á xornada da mañá poderán disfrutar da demostración da Asociación de Fiandeiras Bolboreta, a partir das 19,15 horas.
Tamén haberá espazo para o cine, coa proxección do audiovisual «A última viaxe do afiador» ás 20,00 horas, con entrada libre.
CITA COA TRADICIONAL MALLA E DEGUSTACIÓN DO ISCO NO GUIZO
Como todos os anos, a xornada da tarde culminará coa recreación etnográfica da malla, a partir das oito e media. Xa ás nove, comezarán a pechar as casetas dos expositores, e voltará a música ás dez menos cuarto, coa actuación da Coral Renfe de Monforte de Lemos. A xornada festiva da XIII Feira Tradicional Outrora de Rubián rematará coa degustación do Isco no Guizo a partir das dez e media da noite. A música tradicional servirá como broche final, cun concerto do grupo Remansiño de Ribas de Sil, a partir das once menos cuarto.•
