•O presidente da Xunta de Galicia mantivo unha xuntanza coa presidenta da Deputación de Lugo, no que foi o primeiro encontro institucional entre ambos mandatarios

• O pasado 20 de xullo, o presidente da Xunta de Galicia, Alberto Núñez Feijóo, mantivo en Santiago o primeiro encontro institucional coa presidenta da Deputación de Lugo, Elena Candia. Na xuntanza, a mandataria provincial trasladou ao presidente da Xunta as liñas estratéxicas e prioridades do Goberno provincial para esta lexislatura. Según suliñou Candia, a xestión provincial irá orientada a dar prioridade aos servizos sociais e o sistema de benestar, potenciar o turismo, facer un mellor aproveitamento das novas tecnoloxías, apoiar ao sector lácteo e manter as políticas de discriminación positiva cara a provincia.

ENCONTRO «MOI CORDIAL E POSITIVO», SEGÚN CANDIA
“A xuntanza co presidente tivo un ton moi cordial, moi positivo”, afirmou Elena Candia ao remate do encontro con Núñez Feijóo. A titular provincial destacou que «estamos obrigados a entendernos polo ben dos lucenses». Neste sentido, Candia puntualizou que «nunca empregarei a Deputación de Lugo como outros fixeron, como arma política para xerar tensión”.
Ademais, a presidenta da Deputación expresou a súa confianza «en que sexa posible recuperar pontes de colaboración e entendemento entre ambas administracións para impulsar múltiples asuntos de gran transcendencia para Lugo e Galicia».

COMPROMISOS DA XUNTA EN LUGO
Pola súa banda, o titular da Xunta trasladou a Candia o interese do Goberno galego de levar a cabo o Plan de Loita contra a Desigualdade Económica de forma coordinada, “para que os lucenses, con fondos da Deputación e da Xunta, poidan ter un plan mellor dotado”.
Asimesmo, Núñez Feijóo destacou o compromiso da Xunta de investir 148 millóns de euros no sector lácteo neste 2015. Ademais, o presidente autonómico anticipou a decisión de axilizar os fondos da PAC, “que será unha inxección de forma inmediata de 20 millóns de euros”.
No eido das novas tecnoloxías, o presidente da Xunta suliñou que a plataforma de interoperabilidade «Pasaxe» busca que paulatinamente os datos que operan en poder da Xunta poidan ser accesibles polas administracións locais, e viceversa, para que os cidadáns non teñan que estar entregando os mesmos papeis nos distintos trámites.
Respecto á área de turismo, Feijóo precisou que Xunta e Deputación coinciden «na necesidade de seguir da man para lograr que a Ribeira Sacra sexa declarada Patrimonio da Humanidade”.
Núñez Feijóo tamén lembrou a aposta da Xunta pola mellora das infraestruturas lucense, que se concreta «no corredor entre Lugo-Sarria, xa finalizado, e agora Sarria-Monforte, co obxectivo de finalizalo a finais de 2015 ou nos primeiros meses de 2016”.
Feijóo trasladou a Candia o interese da Xunta de que en setembro se poida reunir á comisión de seguimento do protocolo asinado en 2012 entre Xunta e deputacións, para determinar ámbitos prioritarios e un calendario de actuacións.
Por último, o presidente da Xunta agradeceu o interese da Deputación «para traballar conxuntamente, buscando esa discriminación positiva que imos seguir mantendo coa provincia, tanto nos plans industriais como nos prezos do solo, co Plan Impulsa e co polo aeronáutico de Rozas».•