•A vicepresidenta segunda e responsable da Área de Benestar, Mari Teijeiro, deu a benvida aos 25 nenos e nenas que disfrutarán das súas vacacións na provincia ata o 7 de setembro

• O pasado 14 de xullo, a Deputación de Lugo celebrou unha recepción oficial á comitiva dos delegados da Asociación Solidariedade Galega co Pobo Saharaui, e aos 25 nenos e nenas desta nacionalidade que pasarán o verán con familias lucenses, dentro do programa Vacacións en Paz. Estes menores, con idades comprendidas entre os 9 e os 12 anos, permanecerán en terras lucenses ata o 7 de setembro.

TEIJEIRO DESTACOU A “SOLIDARIDADE E AGARIMO” DAS FAMILIAS
O acto estivo presidido pola Vicepresidenta segunda da Deputación, e responsable da Área de Benestar Social, Muller e Xuventude, Mari Teijeiro, acompañada do delegado saharaui en Galicia, Habibulah Mohamed, e o vicepresidente da Asociación Solidariedade Galega co Pobo Saharaui, Emilio Portela.
Na súa intervención, Teijeiro destacou “a solidariedade e o agarimo” das familias, que “nun acto de gran xenerosidade o que fan é antepoñer a calquera outra circunstancia o benestar destes nenos e nenas, que durante o resto do ano viven en condicións moi duras e as que, polo menos estes dous meses, conseguen deixar a un lado”. A vicepresidenta segunda agradeceu “a constancia e a tenacidade” da Asociación Solidariedade Galega co Pobo Saharaui, á que cualificou de “actor principal dunha iniciativa que a Deputación de Lugo respaldou e seguirá a respaldar”. Teijeiro suliñou que a tarefa da Asociación “é importante porque sen o voso traballo non existiría un proxecto tan beneficioso como este”. A vicepresidenta segunda lembrou que a Deputación colabora co programa Vacacións en Paz cunha achega de 8.000 euros.

INTERCAMBIO CULTURAL E VALORES DE CONVIVENCIA
Ademais, Mari Teijeiro suliñou que “o perfil moi variado de familias que acollen a estes nenos dá conta de que a solidariedade dos lucenses non entende de clases sociais ou de circunstancias persoais”. A responsable provincial de Benestar destacou a “excelente oportunidade” que supón para os núcleos familiares, “especialmente aqueles con nenos e nenas” xa que “o que permite, ademais dun intercambio cultural, é inculcar valores esenciais na nosa democracia como a tolerancia ou o respecto ás outras culturas”.
Por último, Teijeiro afirmou que “a mellor mostra de que é un proxecto interesante e que funciona é que moitos dos nenos e nenas saharauis repiten, e tamén que algunha das familias acolle a dous menores”.•