• Na xuntanza celebrada en Lugo a finais do mes pasado, os responsables da Deputación e da Confederación Hidrográfica Miño-Sil acordaron investir un total de 2 millóns de euros na posta en valor dos espazos fluviais da nosa provincia. Según explicaron a presidenta lucense, Elena Candia, e o presidente da Confederación Hidrográfica, Francisco Marín, en rolda de prensa posterior á reunión, cada un dos organismos asumirá o 50% deste financiamento, e a previsión é que a finais deste ano estean redactados os proxectos de cada actuación que se inclúa neste protocolo de colaboración.
MELLOR SAÚDE DOS NOSOS RÍOS E MÁIS CALIDADE DE VIDA DOS VECIÑOS
Según explicou Candia, estas actuacións corresponderán a construcións de paseos fluviais, adecuación de sendas ou áreas recreativas, entre outras. «Son pequenas actuacións demandadas polos concellos e que repercutirán na mellor saúde dos nosos ríos e na mellora da calidade de vida dos nosos veciños», precisou a titular provincial. A presidenta da Deputación fixo fincapé na necesidade de promover iniciativas dinamizadoras do turismo e de cumprir coas obrigas medioambientais.
Asimesmo, Candia informou de que as actuacións decidiranse en coordinación cos concellos «aos que escoitaremos xa que non nos podemos esquecer do principio de autonomía local e da participación que se ten que dar entre esta institución e os municipios». A presidenta da Deputación agradeceu «a boa disposición do presidente da Confederación Hidrográfica do Miño-Sil para sacar adiante este proxecto».•
