•Denuncian que dende 2011 a Xunta non aportou «nin un só euro» para soster o Museo do Ferrocarril de Monforte»
• A finais do mes de xullo, o grupo socialista no Parlamento de Galicia presentou unha proposición non de lei para instar ao Goberno galego a que convoque «de maneira inmediata» ao Padroado da Fundación de Ferrocarrís de Galicia con sede en Monforte. Según explicou o deputado monfortino Vicente Docasar, un dos firmantes da proposición, esta é a segunda vez no que vai de ano que o grupo socialista denuncia ante o Pleno autonómico o «abandono» do Museo do Ferrocarril de Galicia por parte da Xunta. Na súa argumentación, Docasar xustifica a atención a esta entidade pola importancia histórica que para toda Galicia tivo a estación do ferrocarril de Monforte, eixo vertebrador da apertura da nosa comunidade ao resto do Estado. As instalacións de Renfe en Monforte aínda son na actualidade as máis extensas que a empresa ten en Galicia, cunha superficie de máis de 270.000 metros cadrados, que acollen tanto a terminal de pasaxeiros e mercadorías como o Museo do Ferrocarril de Galicia, un dos máis importantes de España polas características das pezas e infraestruturas que conserva.
Dende o grupo parlamentario socialista denuncian que esta entidade está rexida por un padroado «que leva oito anos sen ser convocado por quen ten a potestade regulamentaria de facelo». No seu escrito, o deputado Docasar lembra a polémica que en 2004 levantara a decisión do daquela conselleiro de Política Territorial da Xunta, Alberto Núñez Feijóo, pola que a presidencia do Padroado pasaba do alcalde de Monforte ao titular da carteira autonómica. Docasar denuncia que este cambio «non só non deu o resultado apetecido, senón que ten posto ao Museo do Ferrocarril nunha situación moi delicada, cun total abandono por parte da Xunta», ata o punto de que «pode abrir as súas portas grazas ás humildes achegas das Deputacións de Lugo e Ourense».•
