Monforte de Lemos conmemora este domingo, 6 de setembro, unha nova edición da Xornada Europea da Cultura Xudía. Con motivo do evento, haberá visitas comentadas á zona de ámbito xudeu da cidade. Os percorridos sairán dende a Oficina Municipal de Turismo, ubicada na rúa Comercio 6, e están previstos tres horarios. A primeira visita será ás 11:30 horas e durante a tarde haberá outras dúas: unha as 17:30 horas e outra comezará ás 19:00. O investigador monfortino Felipe Aira será o encargado de comenta-las visitas.
A Xornada Europea da Cultura Xudía celébrase este ano baixo o lema “Tendendo pontes” e celébrase en 30 países de Europa. A iniciativa serve para afondar no patrimonio histórico e cultural xudío de Monforte. A vila do río Cabe pertence á Asociación “Red de Juderías de España – Caminos de Sefarad”. A inclusión da cidade significa un recoñecemento ó seu pasado medieval e, especialmente, á súa forte pegada hebrea.
Cargando ...
