• Logo das mobilizacións que os gandeiros organizaron en varios puntos da provincia, como Chantada e Sarria, ao longo do verán, a capital provincial concentrou o 3 de setembro a maior mobilización do sector lácteo galego. As diversas asociacións convocantes contaron co apoio de alcaldes, partidos políticos, asociacións, axentes sociais e cidadáns nas diferentes tractoradas, que tiveron o seu punto culminante na concentración de Lugo, prolongada durante varios días.
Dende a Federación Rural Galega (FRUGA), esixiron que os gobernos e administracións «tomen nota da gravidade do problema dos prezos do leite». Dende este colectivo, que forma parte da Plataforam convocante das mobilizacións, pediron ao Goberno galego a constitución dunha mesa de negociación «oficial e formal» na que gandeiros, empresas, distribución e Goberno cheguen a acordos «xustos e dignos, si ou si, nun curto prazo de tempo». FRUGA denunciaba este verán, logo dunha reunión en Madrid, que «o Ministerio de Agricultura está a prolongar a agonía do sector lácteo galego, e a Xunta segue desentendéndose».
A segunda semana de setembro estivo protagonizada pola tractorada e a manifestación celebrada en Santiago de Compostela. Representantes dos gandeiros foron recibidos en San Caetano polo presidente da Xunta, Alberto Núñez Feijóo, onde o mandatario autonómico afirmou que o seu Goberno «vai facer todo o que sexa legalmente posible». Nos últimos días, os gandeiros están á espera do resultado das mesas de negociación abertas entre industria, distribución, e as diferentes administracións.•
Cargando ...
