•A mediados de mes quedaron asinados os convenios entre o organismo provincial e os concellos •Candia sinalou o aforro que supón esta medida para os concellos, e anunciou ampliacións neste servizo
• A financiación do servizo de teleasistencia nos concellos lucenses estará a cargo integramente da Deputación de Lugo, logo da sinatura dos correspondentes convenios entre o organismo provincial e os 66 municipios, celebrada en Lugo o pasado día 15. Según explicou a presidenta da Deputación, Elena Candia, este organismo destina unha achega total de 335.880 euros para financiar ao cen por cen os custes reais da atención asistida telemáticamente no domicilio do usuario. Con esta sinatura, o Goberno provincial formaliza o seu compromiso de asumir con fondos propios este servizo.
SERVIZO 24 HORAS OS 365 DÍAS DO ANO PARA PRETO DE 1.000 MAIORES LUCENSES
Neste sentido, Candia suliñou que o benestar e a asistencia aos lucenses «son o buque insignia deste novo Goberno». «Esta é unha clara aposta que facemos porque o noso desexo é que os nosos maiores poidan vivir con todas as garantías, o maior tempo posible e nas mellores condicións nos seus propios fogares», precisou a mandataria provincial. O servizo de teleasistencia ofrece a preto de 1.000 persoas maiores da nosa provincia a posibilidade de estar atendido a distancia, a través dun dispositivo, as 24 horas do día durante todo o ano. Os usuarios son contactados en varios momentos do día para facer seguemento dos seus hábitos e estado xeral. Diante dunha emerxencia detectada polo dispositivo ou comunicada polo usuario, habilítase un protocolo para que un profesional acuda ao domicilio da persoa e resolva a incidencia.
AFORRO PARA OS CONCELLOS
Según sinalou Candia logo da sinatura dos convenios, esta medida vai supoñer un aforro para os concellos, que ata o de agora viñan aportando o 50% do custe do servizo de teleasistencia. O convenio amosa, según a mandataria provincial, que «este Goberno está plenamente implicado na colaboración e cooperación con municipios».
AMPLIACIÓN DESTA COBERTURA
En relación a este servizo, a deputada de Benestar, Mari Teijeiro, sinalou a «prioridade de darlle contido a este servizo», coa ampliación da súa cobertura. Teijeiro criticou que dende 2007 a Deputación non tramitaba novas altas en teleasistencia. A intención deste Goberno é cambiar a tendencia, para o que «é precisa unha labor de coordinación coa Xunta, xa que é esta a administración que está a facer agora esta cobertura».•
