O Concello de Monforte retoma as xestións para impulsar o ordenamento urbano

A Xunta comprometeuse a reactivar o Plan do Casco Histórico, pero non financiará a redacción dun novo PXOM

O PXOM e o saneamento, dúas prioridades para Monforte. (Arquivo EC).
O PXOM e o saneamento, dúas prioridades para Monforte. (Arquivo EC).

• O Goberno local de Monforte está a retomar as xestións para impulsar o ordenamento urbano da cidade do Cabe. Con este fin, o alcalde José Tomé mantivo unha reunión o día 8 deste mes coa secretaria xeral de Urbanismo, Encarnación Rivas, para tratar aspectos referidos ao ordenamento do casco histórico e á redacción dun novo Plan Xeral.

O PLAN ESPECIAL DO CASCO HISTÓRICO ESTARÍA APROBADO EN 2018

Rivas transmitiu a Tomé o compromiso da Xunta para reactivar o Plan Especial do Casco Histórico, que estaba paralizado, mantendo as axudas que xa foran comprometidas polo Executivo autonómico. Tomé destacou que este plan «é unha ferramente imprescindible para revitalizar o casco histórico, e para que os propietarios da zona saiban que tipo de actuacións poden realizar». O rexedor local comprometeuse a iniciar en breve prazo a tramitación, enviando a correspondente solicitude para, logo de completado o proceso, proceder á execución das anualidades pendentes no casco histórico. Dende o Concello precisaron tamén que en 2016 os cartos destinaríanse á elaboración dun documento para a aprobación inicial, a Xunta recibiría dito informe en 2017, e procederíase á súa aprobación final en 2018, unha vez resoltas todas as alegacións.

O PXOM DEBERÁ FINANCIARSE CON FONDOS PROPIOS

Outro dos asuntos tratados na reunión coa responsable autonómica de Urbanismo foi a elaboración dun novo PXOM para Monforte. O alcalde destacou a necesidade de iniciar a redacción dun documento «imprescindible», que debe recoller «non só a realidade actual, senón tamén debe ser a ferramenta que deseñe a cidade que queremos para o futuro». Tomé precisou que o novo PXOM de Monforte debe incluír tamén as infraestruturas pendentes «e que xa están comprometidas por diversas administracións», e que son «de vital importancia para o desenvolvemento de Monforte».

Neste sentido, a secretaria xeral de Urbanismo precisou que en 2016 a Xunta non destinará fondos para financiar os plans xerais dos concellos. Según explicou Rivas, non están previstas máis achegas deste tipo, xa que o borrador da nova Lei do Solo establece que a Xunta só se vai facer cargo da redación dos PXOM dos concellos menores de 5.000 habitantes. Asimesmo, Rivas lembrou a Tomé que o Concello de Monforte xa recibiu axudas da Xunta para o PXOM en varias ocasións, pero que finalmente non chegaron a executarse. Aínda así, a responsable de Urbanismo da Xunta ofreceu ao Concello asesoramento técnico para a posta en marcha do PXOM.

Con esta situación, o alcalde de Monforte suliñou que «se queremos botar adiante o PXOM, teremos que facelo con fondos propios ou coas achegas que se poidan conseguir doutras administracións».

TOMÉ: «O SANEAMENTO NON VAI SER UN PROBLEMA PARA QUE SE INSTALEN EMPRESAS NO PORTO SECO»

Recentemente, o alcalde de Monforte mantivo unha reunión co presidente da Confederación Hidrográfica Miño-Sil, na que se acordou a elaboración conxunta dun documento que analizará «en profundidade» a rede de saneamento de Monforte. Este documento incluirá, entre outras, a mellora do servizo en varias rúas, o acondicionamento dos bombeos, e a eliminación de puntos de vertidos e infiltracións. Tamén incluirá unha proposta para poder conectar a rede de saneamento do Porto Seco coa rede municipal. «Isto non vai ser un problema para que se instalen empresas», asegurou Tomé.•

Deixa unha resposta

Your email address will not be published.

Nova Anterior

Pepe Carriola amosou os seus traballos de historia gráfica sobre o sur de Lugo

Seguinte Nova

O sur de Lugo sumouse ás reivindicacións dos gandeiros

Últimas noticias sobre GALERÍA

A %d blogueros les gusta esto: