• As 18 Festas de Interese Turístico de Galicia que se celebran na provincia de Lugo contarán con axudas para o seu desenvolvemento. A Xunta de Galicia concede un total de 60.000 euros para contribuír á promoción e difusión destes eventos.
Según explicou a delegada territorial da Xunta en Lugo, Raquel Arias, estas achegas «repercuten no impulso da economía local e no recoñecemento destas festas dentro e fóra de Galicia».
Arias valorou tamén que, a través das Festas de Interese Turístico de Galicia, «a gastronomía, a cultura, a historia e a tradición de Lugo están a obter cada ano máis difusión».
As festas de interese turístico recoñecidas coas subvencións foron o XXXIV Festival Folclórico Internacional do Emigrante en Barreiros, as Feiras e Festas de San Lucas de Mondoñedo, a Mostra do Aceite de Quiroga, o Folión de Carros de Chantada, a Exaltación e Promoción do Ourizo de Cervo, a Festa da Castaña de Folgoso do Courel, a Feira de Santos de Monterroso, a Feira do Viño de Amandi en Sober, a Festa da Malla de Meira, a Festa da Faba de Lourenzá, a Festa de San Lourenzo en Foz, o Nadal do Belén electrónico de Begonte, a pasada edición do Arde Lucus de Lugo, a Festa do Naseiro en Viveiro, a Xira de Santa Cruz de Ribadeo, a XXXI Feira do Bonito en Burela, a Queima das Fachas 2015 en Taboada, e a Festa da Filloa de Cospeito.
Dezaseis destas festas acadaron o importe máximo da subvención, 3.500 euros, para os gastos de apoio, promoción e difusión de cada un dos eventos.•
