•A comezos de outubro, o Consello da Xunta aprobou o Plan de Banda Larga Galicia 2020, que ten como obxectivo ofrecer á cidadanía un acceso equitativo a redes ultrarrápidas de telecomunicación, capaces de proporcionar servizos de entre 30 e 100 megas.
ESFORZO «HISTÓRICO» NOS ÚLTIMOS 5 ANOS
Logo do Consello, o presidente da Xunta, Alberto Núñez Feijóo, explicou que «continuar mellorando as condicións de acceso dos galegos á banda larga é un dos máis importantes compromisos do Goberno galego no eido das tecnoloxías».
O mandatario autonómico fixo balance do esforzo «histórico» que a Xunta realizou nos últimos 5 anos. Feijóo precisou que dende principios de 2009, cando máis de 786.000 galegos non tiñan acceso a internet, pasouse á situación actual na que a prática totalidade dos cidadáns, servizos públicos e parques empresariais de Galicia contan con acceso de polo menos 2 megas de velocidade.
Asimesmo, o mandatario autonómico suliñou que actualmente o 50% da poboación ten acceso a redes con velocidades de ata 200 megas. Tamén destacou que se reforzaron e ampliaron as infraestruturas do operador público Retegal, que terán un «papel chave» para implementar e axilizar os novos despregamentos.
Núñez Feijóo tamén abondou nas cifras que trouxo consigo o esforzo tecnolóxico dos últimos anos. Así, sinalou que estas actuacións permitiron, entre outros, un incremento dun 51% dos fogares galegos con conexión a Internet, que o 70% dos fogares dispoñan deste servizo fronte ao 46% do ano 2010, e que Galicia sexa a terceira comunidade en incremento do uso regular de Internet.
Cara ao futuro, Feijóo destacou que o Plan dará cobertura de cando menos 30 megas á práctica totalidade da poboación, e servizos de banda larga por riba dos 100 megas para os núcleos de poboación de máis de 500 habitantes.•
•A Galicia dixital, en datos
•3 DE CADA 4 FOGARES GALEGOS TEÑEN CONTRATADA INTERNET DE BANDA LARGA, o que supón un 61% máis que hai 5 anos, e sitúa a Galicia a tres puntos da media estatal. NOS CONCELLOS GALEGOS DE MENOS DE 10.000 HABITANTES, MEDROU UN 12,2% O NÚMERO DE FOGARES CON CONEXIÓN DE BANDA LARGA fronte ao 9,4% da media estatal en 2014. UN 79% DOS FOGARES CON INTERNET ACCEDEN Á REDE CON DISPOSITIVOS DE MAN, como tablets ou teléfonos móbiles, o que supón 2 puntos máis que a media estatal de 2014. O 68% DOS GALEGOS USOU O ORDENADOR NOS 3 ÚLTIMOS MESES, e un 72% usou internet neste mesmo periodo. A COMPRA ELECTRÓNICA MEDROU EN GALICIA UN 15,8%, e un 30% dos galegos realizou compra dun produto ou servizo por internet nos últimos 3 meses. MEDROU NUN 35% O NÚMERO DE USUARIOS DAS TIC MAIORES DE 55 ANOS NOS ÚLTIMOS 3 MESES, un aumento moi superior á media estatal, que non chega ao 19%. UN 65% DOS INTERNAUTAS GALEGOS PARTICIPA HABITUALMENTE NAS REDES SOCIAIS, en cifras similares á media estatal. UN 82% DOS INTERNAUTAS DE GALICIA LE OU DESCARGA PRENSA E REVISTAS EN LIÑA, case 3 puntos porcentuais por riba da media estatal. (Fonte: Datos INE outubro 2015, recollidos por AMTEGA).•
Cargando ...
