•Dende Turismo destacaron que este xeodestino incrementou nun 12,51% o número de viaxeiros no que vai de ano
• Xunta e Consorcio de Turismo continuarán a traballar conxuntamente na promoción do xeodestino turístico Ribeira Sacra. Esta colaboración materializouse o pasado 1 de outubro coa sinatura dun convenio en Nogueira de Ramuín, coa presenza da directora de Turismo de Galicia, Nava Castro, e o presidente do Consorcio Ribeira Sacra, Luis Fernández Guitián. Como explicou Castro, este convenio supón continuar coa colaboración realizada a través do Plan de Dinamización, levando agora a cabo actuacións para potenciar este destino xa moi definido no ámbito turístico.
Dende o Consorcio precisaron que as actuacións para as que vai destinadas este convenio inclúen a realización dos 21 murais nos concellos da Ribeira Sacra, as rutas do Viñobús, os Ciclos de Concertos estacionais, as Rutas do Románico e a programación de outono «A caída da folla na Ribeira Sacra», entre outras iniciativas.
Outro dos obxectivos do convenio é acadar unha imaxe uniforme e unificada en todos os establecementos turísticos deste territorio. Según explicou Nava Castro, grazas ao convenio, o Consorcio de Turismo aprobará unha ordenanza reguladora que establecerá a imaxe uniforme para todos os establecementos turísticos do destino.
Castro lembrou que as cifras deste ano falan dun aumento do 12,51% no número de visitantes á Ribeira Sacra no que vai de ano, cun aumento tamén das pernoitas nun 9,75%.•
