•Un total de 280 persoas participaron neste itinerario, dentro do programa organizado polo Consorcio de Turismo
• 280 persoas participaron na Ruta do Románico de Pantón, dentro do programa de itinerarios artísticos organizado polo Consorcio de Turismo Ribeira Sacra. A de Pantón foi a máis demandada das catro Rutas do Románico que o Consorcio desenvolveu entre xuño e mediados de outubro, e que levou 240 visitantes polo roteiro de O Saviñao, 175 polo de Sober, e 139 polo de Chantada.
Dende o Consorcio, destacaron que estas Rutas do Románico están a medrar en afluencia de público un ano máis, cun 38% máis de visitantes que en 2014.
Resulta significativo o feito de que boa parte das visitas realizáronse en días laborais, o que, según os responsables do Consorcio, está relacionado co perfil do viaxeiro, con nivel cultural e económico medio-alto, que escapa dos días de máis aglomeración e pode dispoñer de días libres durante a semana para satisfacer as súas inquedanzas lúdicas e culturais.
Tamén destacou o aumento de visitantes locais, e de turistas procedentes de Castela-A Mancha e Aragón.
MÁIS DE 1.300 PERSOAS PASARON POLA OFICINA DE TURISMO DE PANTÓN NO VERÁN
Asimesmo, a Oficina de Turismo do Concello de Pantó deu a coñecer os datos de visitantes. Un total de 1.312 persoas pasaron por este punto de información, situado no Edificio Sociocultural de Ferreira, entre xuño e setembro. Por meses, a maior afluencia rexistrouse en agosto, con 436 persoas, seguido por setembro, con 380. En xullo, as visitas sumaron 363 persoas, e en xuño a oficina atendeu a 133 turistas. •
