•O pasado 23 de outubro abríronse 11,7 quilómetros de corredor ata Bóveda •En breve estará en uso o tramo intermedio que enlaza en Noceda •Unha vez completado, o corredor comunicará Monforte con Lugo en pouco máis de media hora
• O 23 de outubro quedou aberto ao tráfico un novo tramo da Vía de Altas Prestacións Lugo-Monforte. A inauguración de 11,7 quilómetros de corredor tivo lugar en Monforte, e congregou a un bo número de autoridades, encabezadas polo presidente da Xunta de Galicia, Alberto Núñez Feijóo, que estivo acompañado polos conselleiros de Infraestruturas e Vivenda, Ethel Vázquez, e de Economía e Industria, Francisco Conde, ademais do Presidente da Deputación, Darío Campos, e os alcaldes de Monforte, Bóveda, Pantón, Sarria e O Incio.
CIRCULACIÓN «MÁIS SEGURA E CONFORTABLE«
Logo dun percorrido en autobús polo novo tramo ata o enlace deste corredor en Bóveda, o mandatario autonómico destacou que esta infraestrutura, que estará completada en breve ata Noceda, fará que a circulación polo sur da nosa provincia «sexa máis segura e confortable». Feijóo lembrou que a Vía de Altas Prestacións entre Sarria e Monforte contou cun investimento de 135 millóns de euros, e responde a unha demanda cidadá. «Nada disto tería sucedido se non existise un pobo demandando de forma incansable unhas comunicacións propias do tempo en que vivimos·», precisou o titular autonómico.
MELLORAR A COMPETITIVIDADE DAS COMARCAS DO SUR DE LUGO
Feijóo apuntou tamén as repercusións económicas dunha infraestrutura destas características, que non só mellora a calidade de vida dos cidadáns, senón tamén a competitividade das comarcas do sur de Lugo. «Os galegos estamos máis preto dunha Galicia vertebrada por dentro e conectada por fóra», suliñou o presidente da Xunta, quen fixo referencia ao aumento nun 66% da rede viaria de altas prestacións dende 2009. Feijóo precisou que, deste xeito, ao final da lexislatura «o 80% da poboación de Galicia estará a menos de 15 minutos dunha vía destas características».
O NOVO TRAMO EVITA PRETO DE 16 QUILÓMETROS DE TRAVESÍAS
Pola súa banda, a conselleira de Infraestruturas e Vivenda, Ethel Vázquez, explicou que o novo tramo de 11,7 quilómetros que une Monforte con Bóveda evita aos usuarios preto de 16 quilómetros de travesía. Según Vázquez, o tramo posto en servizo o día 23 deste mes favorece a mobilidade, en mellores condicións de seguridade e comodidade para os condutores. A conselleira de Infraestruturas e Vivenda destacou que o trazado inaugurado respondía a dous aspectos «sumamente importantes». Por unha banda, este vial consegue afastar os tráficos do centro das vilas, de xeito que se alivia o movemento de vehículos en zona urbana.
DE MONFORTE A LUGO EN POUCO MÁIS DE MEDIA HORA
Por outro lado, a posta en servizo deste tramo axuda a conseguir «un importante aforro de tempo» nos traxectos. Vázquez valorou o avance que suporá esta Vía de Altas Prestacións, unha vez que se complete nos vindeiros días co tramo ata Noceda, nos tempos de viaxe entre a capital provincial e a da comarca de Lemos. A responsable de Infraestruturas da Xunta precisou que Lugo e Monforte estarán conectadas en pouco máis de media hora, reducindo á metade os tempos de percorrido que se precisaban hai uns anos.
O ENLACE DO PORTO SECO, A FINAIS DE ANO
Na liña de contribuír á mellora das comunicacións e da competitividade do sur da provincia, Ethel Vázquez anunciou que tamén este ano, o seu departamento ten prevista a conclusión da conexión do Porto Seco coa estrada LU-933. Esta nova infraestrutura, que supuxo un investimento de máis de 6 millóns de euros, estará funcionando antes de finais deste ano. Vázquez suliñou o «grande avance» deste vial para a conectividade deste polo industrial do sur de Lugo coas principais arterias de comunicación, «co conseguinte pulo á xeración de emprego e actividade económica» na zona.•
•Aberto tamén este mes o novo tramo da A-54 entre Palas de Rei e Guntín
•Con estes 15 quilómetros queda completada a metade do trazado da A-54 •Os dous últimos tramos quedarán licitados este ano, para iniciar as obras en 2016
• O 20 de outubro quedaron abertos ao tráfico 15 novos quilómetros da autovía A-54 entre Palas de Rei e Guntín, co que vén completarse a metade do trazado deste vial que unirá a cidade de Lugo coa capital de Galicia. Para a inauguración, desprazáronse ata terras lucenses o presidente do Goberno, Mariano Rajoy, e a ministra de Fomento, Ana Pastor, que acompañaron ao titular da Xunta, Alberto Núñez Feijóo na apertura do novo tramo da que cualificou como unha «infraestrutura fundamental para a vertebración do interior da Comunidade». O mandatario autonómico lembrou que Lugo era unha das poucas cidades que non tiña nexo a Santiago por autovía, polo que a A-54 suporá gañar en prestación, seguridade e competitividade para todos os concellos do interior de Galicia.
Na súa intervención, Núñez Feijóo destacou o conxunto das actuacións en infraestruturas levadas a cabo polo executivo de Rajoy nestes anos. «Nunca tanto se fixo nunha época tan mala como a que estivemos vivindo desde o ano 2011 ao ano 2014», suliñou o presidente da Xunta.
DE LUGO A SANTIAGO EN 15 MINUTOS MENOS QUE ATA AGORA
O novo tramo aberto este mes súmase aos 38 quilómetros de autovía que dende marzo comunican Guntín e Nadela, e que permiten realizar a metade do traxecto entre Lugo e Santiago por unha vía de altas prestacións en 15 minutos menos.
No tramo Palas de Rei-Guntín Fomento investiu 101,2 millóns de euros, dos que 83,5 foron en obra, 15,3 en expropiacións, e os restantes 2,4 en contratos de asistencias técnicas de proxecto, control e vixilancia. Este orzamento foi financiado con fondos FEDER 2007-2013 da Unión Europea.
Este novo tramo da A-54 iníciase no enlace situado no quilómetro 21 da N-547 en Guntín, pasando polo municipio de Monterroso ao norte de dita estrada, e remata no enlace coa nacional no quilómetro 36,8 en Palas de Rei. Neste municipio, a A-54 enlaza coa estrada autonómica LU-231a Friol. O tramo conta con catro viaductos, catro pasos superiores e dezaoito inferiores, un deles para a reposición do Camiño Francés a Santiago, que discurre polo mesmo trazado que a A-54. Ademais, hai dous pasos específicos para animais, e varias zonas nas que se instalaron pantallas antirruídos.
FOMENTO ANUNCIA MÁIS ACTUACIÓNS PARA 2016
Dende Fomento precisaron que a partida de 60 millóns de euros consignada nos Orzamentos do Estado permitirá licitar este ano os dous tramos da A-54 que faltan entre Palas de Rei e Melide e comezar as obras en 2016, ademais de avanzar no tramo Melide-Lavacolla. Ademais, está previsto licitar o vindeiro ano un vial de conexión entre a A-54 e a N-540, co que se eliminará o tramo de peor trazado da nacional no acceso sur a Guntín.
En canto á autovía A-56 de Guntín a Ourense, en Fomento sinalaron que van priorizar os dous tramos da variante norte da cidade das Burgas, onde a intensidade de tráfico é maior, e que corresponden a Eirasvedras-Quintela e Quintela-A Castilla. Ambolos dous proxectos están en fase de redacción, e para o primeiro deles incluiuse a dotación necesaria nos Orzamentos do Estado. Por outra banda, o Ministerio vai seguir impulsando as obras do tramo A Barrela-San Martiño, que foron retomadas en xullo.
FEIJÓO AGRADECEU A RAJOY OS INVESTIMENTOS EN GALICIA DOS ÚLTIMOS ANOS
Durante a inauguración do tramo da A-54 en Palas de Rei, o presidente da Xunta agradeceu a Mariano Rajoy e á titular de Fomento «os máis de 5.000 millóns de euros en infraestruturas» investidos en Galicia polo Goberno central nos últimos anos. Feijóo destacou o feito de que a nosa Comunidade ocupara entre o 12 e 13 por cento do total do Orzamentos Xerais do Estado nos anos de Rajoy como presidente. «Ben vale a pena agradecer cando un Goberno cumpre, e este Goberno, a pesar das dificultades, cumpriu», subliñou.•
