•A comezos deste mes, a Vicepresidencia da Deputación e a Federación Provincial de APAS de Lugo (FAPACEL) presentaron o programa «Coa Educación por diante», organizado en virtude dun convenio asinado entre o organismo provincial e o colectivo lucense. A presentación contou coa presenza do deputado provincial Xosé Ferreiro, do presidente de FAPACEL, Luis Blanco, as responsables do Centro Psicopedagóxico Crea, Lucía Fernández e Zeltia Méndez, a responsable da guía sobre habilidades sociais, Carmen Moreno, e Rubén Pérez, encargado dalgunha das actividades do programa.
CHARLAS PARA PAIS E NAIS, E OBRADOIRO PARA OS SEUS FILLOS E FILLAS
O programa desenvolverase este mes, con charlas destinadas a pais e nais de nenos e nenas de 4 a 12 anos, nas que se dará a coñecer o contido da guía titulada «Escola de Habilidades Sociais». Esta guía explica, en primeiro lugar, en que consisten as habilidades sociais, e reflexiona sobre a importancia da súa adquisición. A continuación, a guía desenvolve os diversos estilos de interacción social, con exemplos práticos para a súa identificación. Por último, a guía inclúe unha serie de pautas educativas para a resolución de conflitos, así como a enumeración de diversos mitos sobre as interaccións sociais.
Co obxectivo de facilitar a asistencia de pais e nais ás charlas, o programa ofrece o «Obradoiro sobre o Conto Popular» para os seus fillos e fillas, a cargo de Rubén Pérez e Elena Centelles.
Unha vez rematado o ciclo de charlas, no mes de decembro remitiranse exemplares das guías ás ANPAS asociadas para repartir entre as familias.•
Cargando ...
