• O monfortino Iván Patiño, responsable da produtora Amanita Films, vén de estrear a súa primeira longametraxe, unha película documental producida en colaboración coa Axencia Galega das Industrias Culturais (AGADIC).
ESTREA NO OURENSE INTERNATIONAL FILM FESTIVAL, E EN CINEUROPA DE SANTIAGO
O documental titulado «Os días afogados», producido por esta firma monfortina en colaboración con AGADIC, presentouse no Ourense International Film Festival (OUFF) o día 20 deste mes. A cinta xa tivera unha extraordinaria acollida na última edición do Cineuropa en Santiago, a primeiros de novembro.
LEMBRANZA DUNHA ALDEA SUMERXIDA NAS AUGAS DO ENCORO DE LINDOSO
O documental producido por Iván Patiño, está dirixido polos galegos César Souto e Luis Avilés Baquero. A cinta narra o drama dos habitantes dunha aldea da Baixa Limia sumerxida polas augas do encoro de Lindoso, en Portugal. Debido aos traballos na presa, o nivel da auga descende e deixa ao descuberto as ruínas dun lugar esmorecido. Varios veciños acuden a contemplar esta visión, que lles sirve para sumerxirse, eles tamén, nas augas dos seus recordos.•
