• O 26 de novembro, o presidente da Deputación de Lugo, Darío Campos, foi recibido no Concello de Monforte polo alcalde, José Tomé, e membros da Corporación, na que foi a súa primeira visita á cidade como mandatario provincial. Tomé puido trasladar ao presidente da Deputación os principais problemas de Monforte «para crecer como cidade e dotala de mellores servizos».
Entre as cuestións planteadas, Tomé trasladou a Campos a necesidade «clave para hoxe e para o futuro» que é o Plan Xeral de Ordenación Urbana, no que se deberá incluír, entre outros aspectos, a recalificación como terreos industriais das parcelas adquiridas no seu día pola Deputación, e adxudicalas ao polígono do Reboredo. Outro dos aspectos tratados na xuntanza foi o saneamento, tanto na rede urbana como nos servizos ás zonas industriais. Este punto requeriría, según Tomé, dun investimento de preto de 12 millóns de euros, para o que sería preciso establecer convenios con diversas administracións.
Tomé tamén trasladou a Campos a necesidade de acometer reformas no espazo urbano e nas parroquias, «que repercutan na creación dunha cidade máis atractiva para a veciñanza, e tamén pensando no turismo». Na xuntanza, o alcalde falou co mandatario provincial de diversos desarrollos urbanísticos e turísticos, como o proxecto dunha praia fluvial no Cabe.
Pola súa banda, Darío Campos suliñou que, pola súa experiencia como alcalde da Pontenova, é consciente das necesidades dos municipios. O presidente da Deputación amosou o seu compromiso de colaborar co concello de Monforte, sobre todo nos aspectos do Plan Xeral e do saneamento.•
Cargando ...
