A Biblioteca de Quiroga superou as 4.000 visitas anuais

Ademais, a estas boas cifras de uso, que inclúen consultas esporádicas e regulares dos diversos recursos, hai que sumar os preto de 700 socios cos que conta a Biblioteca Pública Municipal de Quiroga. Para responder a esta importante demanda, dende o Concello de Quiroga están a poñer en marcha diversas medidas co fin de mellorar este servizo. Por unha banda, o Concello renovou os ordenadores de sala da Biblioteca o pasado verán, para favorecer o uso gratuíto do servizo de acceso á información a través de wifi e internet en sala. Por outra banda, o Concello está a realizar adquisicións de material bibliográfico para actualizar e enriquecer o fondo de libros da Biblioteca Municipal, que xa supera os 8.000 rexistros. Neste sentido, o Concello adquiriu un total de 46 novos títulos, tanto en galego como en castelán, con predominio do xénero de narrativa. Estas adquisicións foron realizadas con cargo á subvención plurianual que a Consellería de Cultura, Educación e Ordenación Universitaria ofrece para a mellora dos fondos bibliográficos da Rede de Bibliotecas de Galicia.•