•Ata o 31 de xaneiro está aberto o prazo de presentación de deseños ao concurso de carteis para a XXXVI Feira do Viño de Amandi, que convoca como cada ano o Concello de Sober. A gran cita enolóxica do sur lucense celebrarase os días 19 e 20 de marzo, coincidindo coa fin de semana do Domingo de Ramos.
Según explicaron dende o Concello, os traballos deben presentarse en formato A3, con formato ríxido para facilitar a súa exposición. O deseño realizarase con técnica libre, e o tema do cartel deberá recoller o espíritu da Feira do Viño de Amandi, facendo especial fincapé no sector vitivinícola, no patrimonio e na cultura da localidade.
PREMIO DE 600 EUROS EN METÁLICO
Asimesmo, as bases establecen que só se poderá presentar un traballo por autor. O traballo gañador será premiado con 600 euros en metálico. A presentación do cartel definitivo, que será a imaxe da Feira en todos os soportes publicitarios, terá lugar o 20 de febreiro. O acto servirá tamén para dar a coñecer o programa da XXXVI Feira do Viño de Amandi, e se desenvolverá nun emprazamento singular do municipio, aínda por confirmar.
As bases están publicadas na web municipal www.concellodesober.com. •
Cargando ...
