•Xa á venda por 3 euros as entradas para o espectáculo de marionetas que porá en escea a compañía Trécola o sábado 26 de decembro
• O Nadal xa comezou a festexarse no municipio de Bóveda. Coincidindo co remate do primeiro trimestre do curso escolar, o CEIP Rosalía de Castro de Bóveda celebrou o tradicional Festival de Nadal, na tarde do venres 18 de decembro. Unha festa que celebra o comezo das vacacións escolares, e que tamén sirve de apertura para unha serie de xornadas lúdicas organizadas dende o Concello de Bóveda.
CITA CO TEATRO DE GUIÑOL PARA TODOS OS PÚBLICOS O SÁBADO 26
A seguinte cita lúdica do Nadal será o sábado 26 de decembro, coa posta en escea, a cargo da compañía Trécola, do espectáculo de marionetas «Traxicomedia de Calixto e Celestino».
Este espectáculo, que se iniciará ás 17,30 horas no Salón de Actos do Centro Sociocultural, vai dirixido a todos os públicos. A obra de marionetas está protagonizadas por tres personaxes, Calixto, Celestino e Margarida, que convertirán unha tranquila xornada de lecer nun sinfín de situacións absurdas e cómicas.
As entradas para esta representación de guiñol, a prezo de 3 euros, xa están á venda no Concello, en horario de 10 a 14 horas, e no Centro Sociocultural de 16,30 a 18,30 horas. O aforo é limitado, polo que os tiquets deberán mercarse con antelación. Este espectáculo está integrado no programa Buxiganga, promovido pola Área de Cultura da Deputación de Lugo.
OCIOTECA GRATUÍTA EN BÓVEDA
Para os días de vacacións escolares, o Concello de Bóveda deseñou diversas actividades integradas na Ocioteca de Nadal, que se desenvolverá os días 28, 29 e 30. As sesións terán lugar no Centro Sociocultural, en horario de 10 a 14 horas. A Ocioteca é gratuíta previa inscrición.
VÍSPERA DE REIS
Unha das citas máis esperadas polos cativos é a víspera de Reis, que en Bóveda ten unha especial significación sociocultural. O día 5, as Súas Maxestades de Oriente visitarán a residencia ás 16,30, e estarán no Centro Sociocultural ás 17 horas, para atender a todos os nenos e nenas do municipio, e entregar agasallos.•
Cargando ...
