•Acordaron crear unha mesa de traballo co fin de potenciar as rutas xacobeas ao seu paso pola provincia de Lugo

O acordo para constituír unha mesa de traballo conxunta entre a Xunta e a Deputación tivo lugar en Lugo o pasado 11 de xaneiro. GPDL

• Os itinerarios xacobeos que discurran pola provincia de Lugo serán obxecto de especial atención por parte das administracións, logo da reunión mantida o día 11 deste mes entre a directora xeral de Turismo, Nava Castro, e o presidente da Deputación de Lugo, Darío Campos. Na xuntanza, na que estiveron presentes a delegada da Xunta en Lugo, Raquel Arias, e o deputado de Promoción Turística e do Territorio, Eduardo Vidal, acordouse crear unha mesa de traballo conxunta entre Xunta e Deputación de Lugo, para potenciar os Camiños a Santiago ao seu paso pola nosa provincia.

PROPOSTA DA XUNTA PARA UNHA MESA ENTRE VARIAS ADMINISTRACIÓNS

Según explicaron os responsables autonómicos, a creación desta mes é unha das medidas incluídas no Plan Director e Estratéxico do Camiño de Santiago 2015-2021, que define as liñas xerais e prioritarias para atender, con criterios de excelencia, ao peregrino do ano 2021.

Neste sentido, a delegada de Turismo de Galicia, Nava Castro, trasladou a proposta da Xunta, que implica na mesa de traballo ao Executivo autonómico, á Deputación e aos Concellos. Asimesmo, será esta mesa a encargada de definir as actuacións nos Camiños Primitivo e do Norte, posto que o Camiño Francés xa está a ser xestionado pola Mancomunidade de Municipios correspondente.

DENDE A DEPUTACIÓN PEDIRON INCLUÍR O CAMIÑO DE INVERNO

Pola súa banda, o presidente da Deputación, Darío Campos, propuxo que a mesa fose máis participativa, integrando a axentes públicos pero tamén privados, como establecementos ou asociacións. Campos suxeriu tamén a participación de alomenos un representante da Mancomunidade de Municipios do Camiño Francés.

Outra das propostas presentadas polo presidente da Deputación referiuse á necesidade de incluír nestas accións ao Camiño de Inverno e ao do Mar, coa finalidade de poñer en valor os máis de 800 quilómetros de rutas de peregrinación que supoñen estes dous itinerarios por terras lucenses.

A reunión entre os responsables da Xunta e da Deputación rematou cun acordo entre ambas partes, que terá en conta as propostas presentadas por Darío Campos. De feito, será o organismo provincial o encargado de abrir dita mesa de traballo, na que se impulsarán finalmente as rutas do Camiño do Norte, Primitivo, Francés e de Inverno. Sobre a inclusión do Camiño do Mar, a Xunta comprometeuse a estudiar a proposta presentada por Darío Campos. Pola súa banda, o mandatario provincial entregou a Nava Castro un exemplar do libro titulado «O Camiño do Mar», editado pola Deputación lucense, e que é a única publicación existente ata o de agora sobre esta ruta xacobea que discurre pola Mariña lucense.•