O 28 de decembro pasado, o Concello de Monforte aprobou o prego de condicións do concurso público para a explotación da cafetería da Praza de Abastos. As bases establecen que a cafetería deberá ser un referente que contribúa á dinamización hosteleira e, por outra parte, indican que a oferta de servizos deberá centrarse na gastronomía local.
MELLORAS NAS INSTALACIÓNS E NOS SERVIZOS QUE SE OFRECERÁN
O alcalde de Monforte, José Tomé, destacou as melloras que se fixeron nas instalacións. «Traballamos para solucionar as filtracións de auga, e ademais a cociña conta cun novo mobiliario co que se pretende ofrecer un mellor servizo, e se instalaron mesas novas e tamén estanterías de aceiro». Tomé Roca tamén anunciou que se cambiará a porta de entrada para un maior aislamento térmico no interior.
O alcalde destacou outra das novidades das bases do concurso, que agora permite a instalación de televisión nesta cafetería, o que favorecerá, según Tomé, que esta adxudicación teña máis interés para os hosteleiros. «Antes non se permitían os medios audiovisuais e iso facía que moita xente non se animara a ir, pero agora iso cambiou e coa televisión os clientes poderán ver programas ou seguir os eventos deportivos», precisou Tomé.
O capítulo de novidades péchase coa posibilidade de que este espazo gastronómico poida servir racións, fronte á anterior concesión que só permitía ofrecer pinchos.•
Cargando ...
