• A Xunta de Galicia, a través da Secretaría Xeral de Igualdade, concedeu un total de 185.104,17 euros en axudas para os catro Centros de Información á Muller (CIM) que operan no sur de Lugo. En concreto, a partida destinada ao CIM de Sarria foi de 67.911,75 euros, mentres que a do CIM de Monforte ascendeu a 40.636,65 euros. Pola súa banda, o centro de Chantada recibiu unha achega de 39.422,6 euros, e o de Quiroga contou con 37.133,17 euros.
A XESTIÓN COMPARTIDA DOS CIM PERMITE ATENDER A MÁIS USUARIAS EN MÁIS TERRITORIO
Según explicaron a secretaria xeral de Igualdade, Susana López Abella, e a delegada da Xunta en Lugo, Raquel Arias, as axudas concedidas en 2015 aos CIM da nosa provincia incrementáronse nun 27% respecto ás subvencións do ano anterior. Asimesmo, destacaron o feito de que a maioría das solicitudes foron presentadas conxuntamente por agrupacións de municipios. Tanto López Abella como Arias suliñaron que esta xestión compartida supón un avance que permite atender máis territorio e a máis potenciais usuarias no ámbito desta provincia. Ademais de eficiencia, este sistema de xestión permite dispoñer de partidas maiores para atender ás necesidades destes Centros de Información á Muller.
No sur de Lugo, os catro CIM contaron en 2015 con axudas solicitadas por agrupacións de municipios. No caso de Chantada, este municipio solicitou a subvención xunto aos de Carballedo e Taboada. Monforte de Lemos fixo o propio cos restantes concellos da comarca de Lemos, e o concello de Quiroga presentou a solicitude para o seu CIM xunto ao municipio de Ribas de Sil. Por último, a solicitude para a axuda do CIM de Sarria foi xestionada conxuntamente por Sarria, Láncara, O Páramo, Paradela e Samos.•
