Publicada a solicitude de inscrición no rexistro comunitario da Indicación Xeográfica Protexida

• A Federación Galega de Panaderías (FEGAPAN) cursou a solicitude de inscrición no Rexistro Comunitario da Indicación Xeográfica Protexida (IXP) Pan Galego, e o documento vén de ser publicado no Diario Oficial de Galicia este mes. Para a tramitación desta solicitude, FEGAPAN contou co apoio e o asesoramento da Consellería de Medio Rural.

PROCEDEMENTO

O procedemento aberto conta con diversas fases. Unha vez publicada esta solicitude, abrirase un prazo de dous meses, nos que os interesados poderán presentar oposicións. As eventuais alegacións serán avaliadas e resoltas pola Consellería do Medio Rural, en concreto pola Dirección Xeral de Gandaría, Agricultura e Industrias Agroalimentarias. Estas resolucións poderán ser recorridas en alzada ante a Consellería.

Unha vez concluída esta fase, Medio Rural aprobaría a Orde pola que se adopta unha decisión favorable, remitindo o expediente ao Ministerio de Agricultura, Alimentación e Medio Ambiente (Magrama) para o seu envío á Comisión Europea. A partir deste momento, e logo do exame do prego de condicións por parte Comisión, publicaríase a solicitude de inscrición no Diario Oficial da Unión Europea para iniciar un novo período de información pública, esta vez a nivel europeo, de seis meses. Este período podería ser reducido a dou meses se non hai alegacións.

Unha vez recibido o prego pola Comisión, a Consellería poderá tramitar o que se denomina Protección Nacional Transitoria, o cal permite utilizar a IXP Pan Galego a nivel español á vez que se continúa coa tramitación europea.

Segundo recolle o prego de condicións da IXP, o pan galego é aquel que ten codia dura e triscante, miga esponxosa e alveolado abundante e irregular, que se elabora de forma artesanal con fariña de trigo brando, da cal unha parte procede de trigos cultivados na comunidade autónoma de Galicia pertencentes a variedades e ecotipos autóctonos galegos, os comunmente denominados «Trigo país» ou «Trigo galego».

CARACTERÍSTICAS OFICIAIS DO PAN GALEGO

A súa elaboración caracterízase pola utilización de masa nai e unha elevada cantidade de auga, así como polos longos tempos de fermentación e cocción, esta última sempre en fornos con soleira de pedra ou materiais refractarios.

O pan amparado pola IXP presentará características como a forma da peza, que inclúe o bolo ou fogaza, a rosca, a bóla ou torta e a barra, cada unha coa súa forma e pesos específicos, indicados no devandito prego, que tamén establece as condicións que teñen que cumprir a codia e a miga, así como o sabor e o aroma.•