•Anunciaron un novo acordo para o periodo 2016-2019 por un total de 320.000 euros

Imaxe da reunión, celebrada en Santiago a finais de decembro, entre a directora xeral de Gandaría, Agricultura e Industrias Agroalimentarias, Belén do Campo, e o presidente de ASOPORCEL, José Antonio Carril. CMR

•A Xunta e os produtores de porco celta van renovar a súa colaboración ata 2019, a través da sinatura dun convenio por importe de 320.000 euros. Así o acordaron na súa reunión a finais de decembro pasado a directora xeral de Gandaría, Agricultura e Industrias Alimentarias, Belén do Campo, e o presidente da Asociación de criadores de gando porcino celta (ASOPORCEL), José Antonio Carril. Este convenio terá como obxectivo apoiar as iniciativas deste colectivo para a recuperación, conservación e fomento do porco celta, a única raza porcina orixinaria de Galicia.

80.000 EUROS ANUAIS DA XUNTA ATA 2019

Según este acordo, a Consellería de Medio Rural aportará en cada anualidade do periodo 2016-2019 un total de 80.000 euros, que servirán para financiar parcialmente as actividades desenvolvidas por ASOPORCEL. Pola súa banda, a asociación comprométese a custear o importe restante.

MANTEMENTO DESTA RAZA AUTÓCTONA

Con este convenio, a asociación de criadores será a encargada de seguir coa realización do inventariado, caracterización e avaliación dos censos da raza Porco Celta. Ademais, manterá o asesoramento na selección e mantemento da variabilidade xenética dos rabaños, realizando un estudo da raza e as súas potencialidades enfocado cara aos novos modelos de produción e comercialización.

APOIO TÉCNICO E CIENTÍFICO PARA ESTES TRABALLOS

Pola súa parte, a Consellería participará activamente en todas as actuacións do convenio, custodiando os bancos xenéticos da raza e realizando as probas necesarias no laboratorio do Centro de Recursos Zooxenéticos de Galicia. Asimesmo, facilitará a ASOPORCEL a información das súas bases de datos que sexa necesaria para o desenvolvemento dos traballos.

DIVULGACIÓN E PROMOCIÓN

Ambas entidades deberán divulgar as aptitudes desta raza autóctona en perigo de extinción, así como os valores comerciais dos seus produtos. Tamén garantirán a accesibilidade aos inventarios de recursos xenéticos da raza por parte dos criadores.•