•A localidade oscense de Jaca albergou o día 15 deste mes, o primeiro Foro de Empresas da Asociación de Municipios do Camiño de Santiago, constituída en Burgos o pasado 10 de novembro. A Asociación, formada por vinte e seis concellos de España e Francia, conta coa colaboración dos gobernos autonómicos e de entidades privadas.
SARRIA, PARADELA, PORTOMARÍN E PALAS DE REI PERTENCEN A ESTA NOVA ASOCIACIÓN
Os municipios que integran esta nova asociación son Jaca, Logroño, Burgos, Astorga, Santiago de Compostela, Canfranc, Santa Cilia, Sangüesa, Puente La Reina, Estella, Los Arcos, Navarrete, Nájera, Santo Domingo de la Calzada, Vitoria, San Juan de Ortega, Castrojeriz, Frómista, Carrión de los Condes, Sahagún, Mansilla de las Mulas, León, Hospital de Órbigo, Ponferrada, Molinaseca, Sarria, Paradela, Portomarín, Palas de Rei, e Melide.
REFORZAR CONXUNTAMENTE AS ACCIÓNS EN PROL DO CAMIÑO
Esta nova entidade supramunicipal ten como obxectivo unir esforzos para reforzar todas as actuacións vinculadas ao Camiño de Santiago desde a atención ao peregrino, á sinalización ou á promoción da ruta declarada Patrimonio da Humanidade.
Ademais da participación pública, representada por administracións locais e autonómicas, o I Foro de Empresas do Camiño de Santiago contou coa presencia de representantes de importantes empresas como Sacyr, Podoactiva, Skydone, Podoactiva, Renfe, Correos e Bankia, entre outras entidades. No foro estivo presente o xerente do Xacobeo, Rafael Sánchez.
ACCESIBILIDADE E COBERTURA DE INTERNET DE ALTA VELOCIDADE, AS PRIMEIRAS LIÑAS DE ACTUACIÓN DESTE FORO
Durante esta primeira reunión, materializáronse as primeiras liñas de actuación da Asociación, e puxéronse en común ideas e formulacións das empresas participantes. Entre outras cuestións, a Asociación de Municipios do Camiño de Santiago traballa xa en colaboración con entidades privadas na accesibilidade do Camiño de Santiago e na cobertura 4G da ruta así como no servizo gratuíto de wifi nas zonas de descanso da ruta.•
