O secretario xeral do Partido Popular na provincia de Lugo, José Manuel Balseiro, descartou a celebración dun Congreso local en Sarria «neste momento». Balseiro fixo este anuncio a mediados deste mes, e explicou que o PP local mantén «a súa total operatividade» na figura do seu Presidente asistido polo conxunto da Executiva, órganos de dirección local que manteñen «a súa plena vixencia e que traballan con total normalidade». Desde a dirección provincial confirmaron que a convocatoria dos congresos está definida nos estatutos do Partido Popular, que prioriza a celebración do congreso nacional, para logo proceder a convocar os congresos autonómicos, provinciais e, por último, locais.
Balseiro indicou tamén que «non existe razón» para a celebración dun Congreso local de carácter extraordinario en Sarria, e que o obxectivo principal do Partido Popular na vila xacobea «debe ser traballar para dar estabilidade ao Goberno municipal». Balseiro criticou que «os actuais mandatarios do Concello e a alcaldesa socialista no garanten dita estabilidade porque son un goberno débil», e que esta postura é «totalmente congruente» co sinalado polo presidente do PP de Sarria.
O secretario xeral dos populares lucenses insistiu na idea de buscar a estabilidade municipal. Balseiro indicou que os populares traballarán «tanto en clave local como nacional convencidos de que agora é o momento de contribuír á estabilidade», coa conformación de «gobernos fortes que permita traballar para impulsar as reformas que se estimen necesarias e por consolidar a incipiente recuperación económica».•
