•Na xornada presentáronse 40 proxectos desta aceleradora de emprendemento •Os 15 finalistas resultantes recibirán financiamento e apoio da Xunta
• O emprendemento e a innovacion déronse cita en Pantón o pasado 16 de xaneiro. O balneario de Augas Santas serviu de escenario para a presentación dos 40 proxectos seleccionados en Vía Galicia, a aceleradora de innovación empresarial impulsada pola Xunta e Zona Franca, co obxectivo de impulsar o emprego de calidade na nosa provincia.
EMPREGO DE CALIDADE «PARA FACER PAÍS»
O acto contou coa presenza do conselleiro de Economía, Emprego e Industria, Francisco Conde,e a delegada da Xunta en Lugo, Raquel Arias. Na súa intervención, Conde resaltou o potencial estratéxico destes 40 proxectos «de primeiro nivel», que xa remataran a fase de Academia en Vigo e Lugo, e que «teñen un gran potencial para converterse en negocios sólidos e competitivos, xerando empregos de calidade, mellorando a nosa capacidade innovadora e, en definitiva, facendo país».
ATA 75.000 EUROS DE FINANCIAMENTO
O conselleiro destacou o «esforzo que está a facer a Xunta e Zona Franca en Vía Galicia, contribuíndo a que Galicia teña «un dos ecosistemas emprendedores máis potentes de España, apoiando á vangarda do tecido empresarial galego do mañá». Conde lembrou que este ecosistema impulsou a creación de máis de 1.200 empresas na provincia de Lugo os últimos tres anos.
Dos 40 proxectos, foron 15 os seleccionados para pasar á derradeira fase deste proxecto. Estes 15 finalistas recibirán apoio institucional e financeiro, con ata 75.000 euros de capital a través da Axencia Galega de Innovación e de XesGalicia, ademais de infraestruturas para poñer en marcha a empresa, e asesoramento experto para desenvolver o seu plan de negocio e captar financiamento.•
