José Manuel Barreiro non optará á presidencia do PP lucense: Elena Candia e Raquel Arias anunciaron as súas candidaturas

•José Manuel Barreiro: «A unidade é o activo máis importante do PP de Lugo»

•As candidaturas de Candia e Arias foron anunciadas logo de que o actual presidente, José Manuel Barreiro, renunciara a presentarse á reelección, despois de 14 anos á fronte do Partido Popular de Lugo

José Manuel Barreiro, facendo declaracións aos medios no Senado este mes. (Foto cedida).
José Manuel Barreiro, facendo declaracións aos medios no Senado este mes. (Foto cedida).

•O 4 de febreiro, José Manuel Barreiro anunciaba que non se ía presentar á reelección como presidente do Partido Popular de Lugo no congreso previsto para o 6 de marzo. Logo de 14 anos no cargo, Barreiro explicou que as súas razóns para non concurrir ao posto responden «a tres principios: a responsabilidade, a lealdade e a coherencia política». O aínda presidente precisou que o seu posto como voceiro no Senado «nun mandado especial obriga a redobrar os esforzos, o que esixe unha especial dedicación». Despois de agradecer a súa confianza a militantes, alcaldes e voceiros do PP, así como a Feijóo e Rajoy, Barreiro salientou que «a unidade é o activo máis importante do PP de Lugo».•

Elena Candia anunciou a súa candidatura para presidir o PP lucense

A alcaldesa de Mondoñedo e portavoz do grupo provincial do Partido Popular, Elena Candia, acompañada de Ramón Carballo, subdelegado en funcións do Goberno en Lugo, durante o anuncio da súa candidatura a presidir o PP lucense. (Foto cedida).
A alcaldesa de Mondoñedo e portavoz do grupo provincial do Partido Popular, Elena Candia, acompañada de Ramón Carballo, subdelegado en funcións do Goberno en Lugo, durante o anuncio da súa candidatura a presidir o PP lucense. (Foto cedida).

• A alcaldesa de Mondoñedo e voceira do grupo provincial do Partido Popular na Deputación, Elena Candia, anunciou que se presentará como candidata a presidir o PP lucense. Candia fixo pública a súa decisión o pasado 5 de febreiro, acompañada polo subdelegado en funcións do Goberno en Lugo, Ramón Carballo, unha vez se coñeceu a renuncia á reelección por parte do actual presidente do partido na provincia, José Manuel Barreiro.

CANDIA OPTARÁ Á PRESIDENCIA ACOMPAÑADA POR CARBALLO DE NÚMERO DOUS

Elena Candia xustificou a súa decisión de presentarse á presidencia do PP lucense en rolda de prensa na sede do partido. «Somos a candidatura dos militantes do PP de Lugo, eles motivaron que demos este paso e queremos ser merecedores da súa confianza», afirmou Candia en presenza de Ramón Carballo, que concorrerá como vicepresidente na lista encabezada pola rexedora mindoniense. Na súa presentación, Candia asegurou que a súa «non é a candidatura de Barreiro, de Feijóo nin de Rajoy, non hai etiquetas, a nosa vocación é a de representar a todos os militantes desta provincia».

CANDIDATURA QUE COMBINA «EXPERIENCIA E RENOVACIÓN»

Na súa intervención, tanto Candia como Carballo tiveron palabras de agradecemento á figura do presidente do PP de Lugo, José Manuel Barreiro. «O seu exemplo, compromiso, a súa dedicación, capacidade de traballo, liderado e xenerosidade son un exemplo para todos, o mellor presidente que nunca tivo este partido e merece que se coide o seu legado», precisou a alcaldesa de Mondoñedo.

Elena Candia e Ramón Carballo presentaron un proxecto de futuro baseado «na ilusión, nos valores e principios que representa o PP e no reto que presentan os lucenses: máis participación, máis transparencia, máis iniciativa e solucións eficaces». Os candidatos a encabezar o PP lucense defenderon a presentación dun proxecto «de moita xente», e que conta cos apoios suficientes para presentar unha candidatura e un proxecto «que combina con acertado equilibrio experiencia e renovación».•

Raquel Arias fixo pública a súa intención de presidir o PP de Lugo

Raquel Arias, o día do anuncio da súa candidatura á presidencia do PP de Lugo. (Foto cedida).
Raquel Arias, o día do anuncio da súa candidatura á presidencia do PP de Lugo. (Foto cedida).

• O luns 8 de febreiro, Raquel Arias Rodríguez anunciaba en rolda de prensa a súa intención de presidir o Partido Popular de Lugo. O anuncio da candidatura da actual delegada territorial da Xunta en Lugo viña baseado, según explicou a propia Arias, nun «proceso de cambio» no que a candidata representa a un «novo equipo de traballo conformado por militantes de base e responsables institucionais e políticos».

«A RENOVACIÓN QUE PIDE A SOCIEDADE»

Raquel Arias apuntou a que este equipo que encabeza está «convencido da necesidade de facer a renovación que está a pedirlle a sociedade á clase política». A candidata soberina a presidir o PP provincial definiu esta renovación «non como un cambio de caras ou unha cuestión de idade, senón como un proxecto de futuro e de equipo», que priorizará «as demandas que nos formulan os afiliados e as necesidades que expresa o conxunto da sociedade».

«DAR VOZ AOS NOSOS AFILIADOS NAS DECISIÓNS IMPORTANTES DE PARTIDO»

A proposta encabezada por Arias entende ao Partido Popular como «un organismo vivo, atento ao que pasa ao seu arredor, dinámico e flexible», ao tempo que aproveita «a solidez e garantía» que outorga «o partido hexemónico na provincia de Lugo». Dentro desta nova dinámica, o equipo encabezado por Raquel Arias basea a súa candidatura na «participación, xa que escoitar non é suficiente, e temos que dar voz aos nosos afiliados, fomentando a súa participación nas decisións importantes de partido». Arias aludiu á importancia de «aproveitar as sensibilidades da sociedade que nos transmiten os 12.000 afiliados do partido», dando voz á militancia, e reforzando a «presenza permanente do partido na rúa.

PROXECTO «NON CONTINUISTA PERO SÍ AGLUTINADOR»

Na presentación da súa candidatura, Raquel Arias suliñou que o seu proxecto «non é continuista, pero sí aglutinador, no que se poidan ver representados todos os afiliados». A actual delegada da Xunta en Lugo recoñeceu que, «sen renunciar en absoluto ao noso pasado, temos claro que non fomos capaces de estar á altura do que a cidadanía demandaba». Neste sentido, Arias aposta polo «debate interno entre compañeiros, nunca entre adversarios, para o enriquecemento do noso proxecto político», e gabou o feito de que haxa varias candidaturas porque «redundará en beneficio do noso partido, que sairá máis reforzado e máis acordo cos retos». Raquel Arias afirmou que a súa candidatura opta «pola suma de ideas», xa que «no noso proxecto non sobra ninguén».•

 

 

 

Deixa unha resposta

Your email address will not be published.

Nova Anterior

O club Neka acadou 11 medallas no Open internacional de Esposende

Seguinte Nova

Os Puntos Limpos mellorarán a recollida de aparatos eléctricos

Últimas noticias sobre ASOCIACIONISMO

A %d blogueros les gusta esto: