• O Concello de Sober recibiu unha trintena de traballos para o Concurso de Carteis da XXXVI Feira do Viño de Amandi, que se celebrará os días 19 e 20 de marzo.
CARTEIS CHEGADOS DE FÓRA DE GALICIA
O alcalde, Luis Fernández Guitián, agradeceu esta alta participación, similar a do ano pasado, e precisou que o concurso «ten xa carácter nacional». O rexedor local precisou que os deseños presentados procedían non só de Galicia e da Ribeira Sacra, senón tamén de puntos como Valencia, País Vasco, Cataluña ou Castela-León.
As bases do concurso establecían que os carteis debían recoller o espíritu da Feira do Viño de Amandi, con especial atención ao sector vitivinícola, patrimonial e cultural da localidade. O fallo do xurado darase a coñecer o 20 de febreiro, cando se presenten tamén as actividades da feira nun acto que se desenvolverá nos Muíños do Xábrega. O deseño gañador contará cun premio de 600 euros en metálico, e será a imaxe promocional da XXXVI Feira do Viño de Amandi, tanto en cartelería como en programas de man.
EXPOSICIÓN COS TRABALLOS
A totalidade dos traballos presentados a concurso comporán unha exposición, que permanecerá aberta dende o 19 de marzo ata o 20 de abril.•
