•A XIV Feira Medieval celebrarase na cidade do Cabe os días 26 e 27 de marzo •As persoas interesadas en contar cun stand de alimentación, artesanía ou comercio poderán solicitalo ata o 1 de marzo

• O Concello de Monforte vén de abrir o prazo para a inscrición dos postos comerciais que participarán na XIV Feira Medieval. Este importante evento, que reúne historia, artesanía, lecer e gastronomía, celebrarase na cidade do Cabe durante a fin de semana do 26 ao 25 de marzo.

PRAZOS PARA A SOLICITUDE E LISTADO DEFINITIVO

Según explicou a concelleira de Cultura de Monforte, Marina Doutón, durante a presentación das bases da Feira, os vendedores interesados en instalar un posto deberán presentar a súa solicitude antes do 1 de marzo ás 14 horas. Doutón precisou que a relación definitiva de participantes será publicada na web do Concello de Monforte o 7 de marzo, e no documento tamén se indicará o procedemento de pago.

A FEIRA PRIORIZARÁ AOS VENDEDORES DE MONFORTE E DA COMARCA DE LEMOS

Marina Doutón destacou que as bases da XIV Feira Medieval priorizarán as solicitudes presentadas por vendedores de Monforte e da comarca de Lemos. A convocatoria establece tres modalidades para os postos, artesanía, alimentación e comercio. Asimesmo, os participantes que desexen realizar obradoiros ou demostracións nos seus postos deberán indicalo ao formalizar a súa solicitude.

As inscricións poden realizarse na Oficina Técnica de Emprego, situada nas Casiñas da Compañía, ou ben a través dos teléfonos 982 88 47 75 e 698 18 15 51.

CARACTERIZACIÓN MEDIEVAL DOS POSTOS E DOS VENDEDORES

A responsable de Cultura no Concello de Monforte precisou tamén que a valoración das solicitudes terá en conta aspectos como o carácter artesanal dos produtos ofertados, a vestimenta medieval dos vendedores, e a caracterización medieval e engalanado dos postos. A comisión organizadora dotará a cada posto dunha tarxeta de identificación, que deberá estar visible ao público durante a celebración da Feira.

JOSÉ QUIROGA DESEÑOU O CARTEL DA XIV FEIRA MEDIEVAL

Asimesmo, o Concello xa deu a coñecer o cartel anunciador da XIV Feira Medieval de Monforte, que foi deseñado por José Quiroga.

Dende o Concello tamén suliñaron que a organización da XIV Feira Medieval de Monforte de Lemos conta coa colaboración da Deputación de Lugo, o Centro Comercial Urbano e a Asociación Provincial de Empresarios da Provincia de Lugo.•