• Iniciativa Por Chantada-CUP vén de facer pública unha proposta para impulsar a fusión dos concellos de Chantada, Carballedo e Taboada. Según explican os responsables desta formación política, a proposta basearíase en seis puntos. A fusión proporíase nun referendum, baixo a figura dunha única entidade administrativa, con servizos descentralizados, con máis de 10 millóns de orzamento para unha poboación superior a 14.000 habitantes. Crearíase o Consello das parroquias, para reforzar o seu papel como figura con «auténtica personalidade histórico-xurídica», ademais dun Regulamento de participación veciñal. A nova entidade contaría cun orzamento participativo anual, e cun plan de choque social con máis de 2 millóns de euros anuais. As liñas de actuación desta entidade centraríanse en aspectos como a xestión eficaz da dispersión, creación de emprego, dinamización económica e turística, defensa do tecido produtivo e loita contra a exclusión social.
A proposta tamén impulsaría a mancomunidade de concellos da Ribeira Sacra, a supresión da Deputación, e o reforzo da autonomía local. Por último, solicitaríase á Xunta e ao Goberno central un plan especial contra a crise demográfica.•
