•Na fin de semana do 2 e 3 de abril, a Rúa do Porvir acollerá a V Feira de Antigüidades da Eurorrexión-XXI Feira de San Lázaro
• Un ano máis, Sarria recuperará o seu pasado poñendo en valor a súa tradición anticuaria. Na primeira fin de semana de abril, a vila celebrará a V Feira de Antigüidades e Restauración da Eurorrexión- XXI Feira de San Lázaro, un evento incluído dentro do proxecto Eixo Emprende, cofinanciado ao 75% polo Fondo Europeo de Desenvolvemento Rexional (FEDER) a través do Programa de Cooperación Transfronteiriza Interreg VAI España-Portugal 2014-2020. Ademais de Sarria, neste proxecto participan O Barco de Valdeorras, a Eurocidade Verín-Chaves, Bragança, a Deputación de Ourense e o Eixo Atlántico.
A Feira desenvolverase o sábado 2 e o domingo 3 de abril, convertindo a rúa do Porvir nun museo ao aire libre. Neste espazo, os visitantes poderán disfrutar das propostas de coleccionismo e antigüidades nos preto de 23 expositores procedentes de diversas localidades da Eurorrexión Galicia-Norte de Portugal. Mobles, xoias, libros, e todo tipo de obxectos para coleccionismo e decoración integran o catálogo de productos desta Feira, que se está a consolidar como un dos eventos máis singulares do sur de Lugo.
ESPAZO XOVE: IDEAS PARA O INTERIORISMO MÁIS ACTUAL
A V Feira de Antigüidades e Restauración da Eurorrexión ofrece ademais un amplo programa de actividades culturais e artísticas. Así, o Espazo Xove volta un ano máis, cunha oferta específica para un público que busca a exclusividade. A importancia do interiorismo e da reciclaxe no mundo actual convirte ao Espazo Xove nun punto de encontro indispensable para a decoración máis actual e suxerente.
OBRADOIROS
Asimesmo, a V Feira de Antigüidades conta con diversos obradoiros, para coñecer in situ o traballo dos artesáns. O obradoiro-expositor de talla en madeira da Asociación Sarricanta amosará os traballos do alumnado, ao tempo que se elaboran novas pezas. Este obradoiro estará aberto en horario de mañá e tarde. Pola súa banda, o obradoiro-expositor Cerâmica Normand traerá o saber artesanal da localidade portuguesa de Barcelos, ademais da posibilidade de mercar artesanía e produtos da zona. A pintura tamén estará presente na Feira, coa exposición do artista Rodim, aberta en horario de mañá e tarde na sala Rodim da rúa de San Lázaro. A tradición da luthería medieval pode disfrutarse visitando de catro a oito da tarde o obradoiro de Germán Luthier, situado no seu taller da rúa Marqués de Ugena.
Para amenizar o ambiente, a rúa do Porvir acollerá polas tardes varias actuacións de danza e música tradicional galega, a cargo da Asociación Peleriños o sábado, e da Asociación Meigas e Trasgos o domingo.
ACTIVIDADES NA CASA DA CULTURA
Ademais das actividades ao aire libre, desenvolveranse varios obradoiros e exposicións na Casa da Cultura de Sarria. O sábado pola mañá, emitirase en directo dende o salón de actos o programa de actualidade e entrevistas «Somos quen», da Radio Galega. Asimesmo, dende o xoves 31 de marzo ata o domingo 3 de abril, estará aberta en horario de mañá e tarde a exposición da colección de ourivería antiga do Museo Provincial de Lugo.
O programa da V Feira de Antigüidades e Restauración da Eurorrexión complétase coa mostra dos traballos de bolillos da Asociación de Palilleiras do Camiño de Santiago de Sarria, que realizarán demostracións en directo. Tamén poderá verse a exposición de bordados de Filomena Losada, a de figuras de ferro a cargo de Francisco Vázquez, e a mostra de costura creativa de Aurora Rodil. Ademais, para fomentar a creatividade dos máis novos, o sábado haberá un obradoiro infantil de elementos decorativos.•
