• Durante os días 12 e 13 de marzo, tivo lugar en Sarria e Samos o Encontro da Fraternidade Internacional do Camiño de Santiago (FICS), no que participaron representantes de administracións locais, asociacións, hospitaleiros e peregrinos chegados de varios países. O Encontro rematou coa aprobación dunha serie de resolucións que afectan a varios aspectos do Camiño de Santiago, e que dende a FICS van trasladar ao Cabildo da Catedral de Santiago para a súa consideración.
Unha das resolucións máis singulares é a referida á ampliación dos criterios de distancia para a obtención do certificado de peregrinación ou Compostela, fixando esta distancia en torno aos 300 quilómetros. Según explicaron dende a FICS, esta distancia era a orixinaria entre as sedes principais das que partían as principais Rutas xacobeas ata a vila de Compostela. Esta proposta contempla certas excepcións, como a peregrinaxe de persoas con discapacidade, ou itinerarios históricos cunha distancia menor a 300 quilómetros.
Outra das resolucións aprobadas no Encontro Internacional de Sarria e Samos propón que a Xunta traslade a xestión integral do Camiño dende as institucións turísticas ás propiamente culturais.
O Encontro tamén resolveu sobre a cultura da hospitalidade, aprobando que nos albergues públicos se priorice aos peregrinos que superen os 300 quilómetros, e que a hospitalidade tradicional, «feito esencial do Camiño», según recollen as actas do Encontro, conte con protección oficial, ao tempo que se unifican os regulamentos dos albergues.
Por último, o Encontro reivindicou a restitución do premio Elías Valiña, así como o mantemento das diferentes credenciais, fronte ao intento unificador por parte do Cabildo compostelán.•
Cargando ...
