•Anunciaron a reagrupación dos GDR lucenses, e a constitución dun novo grupo no sur lucense con 13 concellos

• O pasado 8 de abril, o Concello de Bóveda acolleu unha reunión de traballo do Grupo de Desenvolvemento Rural (GDR) Ribeira Sacra, para tratar da nova redefinición destas entidades que anunciou AGADER para a xestión do novo programa Leader 2014-2020.

NOVO GRUPO

Esta redistribución contempla a reducción dos 31 GDR actuais que hai en Galicia a 24. Na nosa provincia, o mapa de GDR reducirase de oito a seis. Deste xeito, os oito concellos que integraban o GDR Ribeira Sacra pasarán a formar novo grupo xunto cos municipios de Folgoso do Courel, O Incio, As Nogais, Samos e Triacastela, polo que os seus alcaldes e representantes tomaron parte na reunión de Bóveda.

Na xuntanza, acordouse iniciar os trámites para a constitución deste novo GDR cos 13 concellos que integran o territorio sinalado por AGADER, e ir traballando na elaboración da candidatura para a xestión do Leader 2014-2020.

CHARLAS INFORMATIVAS

Con este fin, decidiuse organizar unha serie de charlas informativas polos 13 concellos, informando á cidadanía e axentes sociais desta situación, e pedindo que colaboren na elaboración da estratexia do novo GDR.•