• A Asociación Monfortina de Amigos do Ferrocarril (AMAFER) deu a coñecer, o pasado 19 de abril, o fallo do xurado da segunda edición do premio «Monforte al Ferrocarril», que este ano recaeu en Miguel Rodríguez Bugarín.
GRAN TRAXECTORIA ACADÉMICA E DIVULGATIVA EN TORNO AO FERROCARRIL EN GALICIA
O xurado decantouse pola candidatura de Rodríguez Bugarín «pola súa longa traxectoria académica como Catedrático de Ferrocarriles, pola súa importante contribución á investigación e ao estudo do transporte ferroviario en Galicia, así como pola grande labor de divulgación que durante anos veu realizando sobre este modo de transporte».
O xurado desta segunda edición do premio «Monforte al Ferrocarril» estivo composto por José Tomé Roca, alcalde de Monforte de Lemos, en calidade de presidente; Fermín Avellaneda Vázquez, presidente de AMAFER, en calidade de secretario; Sonia Sánchez Carbajales, representando á Dirección Xeral de Mobilidade, en calidade de vogal; Miguel Ángel Sotuela Vega, deputado provincial en Lugo, en calidade de vogal; Gerardo Pallares Sánchez, representando ao Colexio de Enxeñeiros de Camiños, Canais e Portos de Galicia, como vogal; e Xosé Manuel Pereiro Sánchez, en representación do Colexio de Xornalistas de Galicia, en calidade de vogal.
A entrega do premio «Monforte al Ferrocarril», que consta dunha reprodución en bronce da escultura que homenaxea aos ferroviarios na Praza da Estación, celebrarase o 9 de maio ás 12 horas no Concello de Monforte.•
