•Nesta edición ofrecerase unha homenaxe póstuma ao colleiteiro Guillermo Nogueira Veloso

• O domingo 8 de maio celebrarase no muíño de Bendillo a XVI Mostra do Aceite de Quiroga, para poñer en valor un dos produtos máis afamados das terras quiroguesas, e que influiu notablemente na configuración dos costumes e das tradicións da contorna. Por esta razón, ademais de disfrutar coa calidade do aceite, os visitantes poderán achegarse á aldea de Bendilló para coñecer o proceso de elaboración tradicional deste produto, que se recrea anualmente o día da Mostra. A almazara conserva todos os aparellos que se empregaban para extraer o chamado «ouro líquido» das olivas procedentes das árbores milenarias que aínda dan froito no val do Sil.

PROGRAMA DA XVI MOSTRA DO ACEITE DE QUIROGA

A xornada festiva do domingo 8 de maio iniciarase ás 11,30 horas, coa posta en funcionamento do muíño de Bendilló, que estará aberto ao público ao longo de toda a xornada. A música chegará ao espazo da Mostra ás 11,45, coa actuación do grupo de música tradicional Os Palletas. Xa ás doce, terá lugar a Cata dos aceites participantes na Mostra, no interior da Capela das Farrapas, situada ao carón do recinto feiral.

Este ano, a Mostra do Aceite de Quiroga inclúe unha homenaxe póstuma ao colleiteiro Guillermo Nogueira Veloso, á unha do mediodía. A continuación, voltará a música da man das agrupacións locais Banda de Gaitas San Martiño de Quiroga, o Grupo de Gaitas O Recanto de Quiroga, e o Grupo de Danza Arume da Queiruga. Pola súa banda, O Recanto ofrecerá unha actuación ás 14,00 horas. Ao longo de toda a xornada, haberá expositores onde se poderá mercar produtos típicos da zona, así como postos de polbo e churrasco.

A XVI Mostra do Aceite de Quiroga está organizada polo Concello de Quiroga, coa colaboración da Xunta de Galicia, a Área de Turismo da Deputación, e Abanca. •