•A denuncia foi interposta pola Plataforma Sarriana polo Río e ADEGA •Dende a Plataforma lamentan a «desidia» das Administracións en relación ás obras de encanamento do río, polas consecuencias para o medio ambiente e o patrimonio
• O pasado 18 de abril, a Plataforma Sarriana polo Río facía pública a súa valoración da sanción administrativa que declara á Confederación Hidrográfica Miño-Sil responsable dunha infracción grave.
INFRACCIÓN GRAVE CONTRA O PATRIMONIO
Según explicaron dende a Plataforma, esta infracción está tipificada na Lei 8/1995, do Patrimonio Cultural de Galicia, por acometer a Confederación a tala de, polo menos, 36 árbores de certo porte en agosto de 2014 na ribeira do río Celeiro «sen contar coa previa e preceptiva autorización da Consellería de Cultura e dentro do contorno inmediato de protección da ponte da Áspera e no territorio histórico encadrado na categoría de Ben de Interese Cultural (BIC) Camiño Francés a Santiago».
A denuncia foi interposta pola Plataforma Sarriana polo Río e ADEGA en sendos escritos, onde denunciaban as «talas agresivas e inxustificadas» de especies autóctonas que estaba a realizar a Confederación. A Plataforma considera que este organismo manifestou «unha vez máis o seu absoluto desprezo polas normas e pola Xunta de Galicia», ao recoñecer «expresamente ser responsable dos feitos» que executou «sen control arqueolóxico» e «sen solicitar nin obter preceptiva autorización nin con carácter previo nin tampouco posterior».
A CONFEDERACIÓN ACTUOU «CON TOTAL IMPUNIDADE PORQUE NINGUÉN LLE PARA OS PÉS», SEGÚN A PLATAFORMA
A Plataforma interpreta que a Confederación actúa así «polo convencemento de que ten total impunidade». Dende este colectivo veciñal suliñan que «os dirixentes e funcionarios da Confederación non asumen a responsabilidade dos seus actos», xa que as multas e sancións económicas «van contra os orzamentos da entidade, que pagamos todos os contribuíntes». A Plataforma considera tamén que esta «actitude impune» débese «a que ninguén lle para os pés», en referencia ao posicionamento da Xunta de Galicia e do Concello de Sarria. «Só un pequeno grupo de cidadáns, a costa de esforzos particulares» foi quen de denunciar esta situación, según suliñan dende a Plataforma Sarriana polo Río. •
Cargando ...
