• A Xunta vén de dar o seu apoio á creación dunha nova Indicación Xeográfica Protexida (IXP) para a carne de vaca e boi de Galicia, unha iniciativa promovida polo sector da carne e pola IXP Ternera Gallega.
RAZAS GALEGAS DENTRO DESTA IXP
Segundo explicaron os responsables da Consellería de Medio Rural, o obxectivo desta nova IXP é preservar a carne de calidade procedente das vacas e bois da nosa Comunidade, así como poñer en valor este produto a nivel comercial. A nova IXP incluiría na súa protección a carne procedente das principais razas existentes no noso territorio: a Rubia Galega, Morenas Galegas, Asturiana de los Valles, Limusina, Rubia de Aquitania e Frisona, así como os cruces entre estas especies.
REQUISITOS PARA O PRODUTO
Dende a Consellería de Medio Rural lembraron os requisitos esixidos para que o produto poida estar amparado baixo esta nova Indicación Xeográfica Protexida. Por unha banda, a carne deberá presentarse madurada e refrixerada, sen que poida ser conxelada en ningún momento ao longo do proceso de obtención e comercialización. A carne amparada procederá de vacas que tiveran polo menos unha xestación antes do sacrificio, e de bois castrados antes do ano de vida que superen cando menos os 48 meses de idade ao sacrificio. Tamén se valorará que o grao de engraxamento, a conformación e as características organolépticas sexan os axeitados e típicos deste tipo de carnes.
CONTROL DA ORIXE E PROCESO DOS ANIMAIS E DO PRODUTO FINAL
Segundo o acordo, a nova Indicación Xeográfica Protexida abarca a totalidade do territorio galego. Os animais deben nacer, criarse, engordarse, sacrificarse e despezarse en Galicia, co obxectivo de preservar a orixe, a especificidade e controlar as condicións de obtención do produto. Cada fase do proceso e tipoloxía de carne constará dun etiquetado concreto.
UNIFICACIÓN DA XESTIÓN DAS IXP
En canto á xestión, está previsto o establecemento dun Consello Regulador das Indicacións Xeográficas Protexidas de Carne de Vacún de Galicia, que se ocupará da xestión e control das carnes amparadas pola IXP Ternera Gallega e pola IXP Vaca e Boi de Galicia, baixo criterios de coordinación, aforro de custos e operatividade sectorial.•
