• Durante a inauguración en Monforte da convención de Cidades Creativas, celebrada a principios de xullo, o presidente da Deputación de Lugo, Darío Campos Conde, anunciou que vai tratar de activar a candidatura da Ribeira Sacra a Patrimonio da Humanidade. Con este fin, Campos Conde vai convocar en Lugo aos responsables da Deputación de Ourense, a Valedora do Pobo e a Dirección Xeral de Patrimonio da Consellería de Cultura, para desbloquear a situación.
O mandatario provincial explicou que decidiu tomar a iniciativa neste tema, posto que se vai cumprir un ano dende que se pediu a colaboración da Xunta, sen ter recibido resposta.
Campos Conde lembrou que a Deputación de Lugo “apostou hai tempo por acadar a declaración da Ribeira Sacra como Patrimonio da Humanidade pola UNESCO, proxecto ao que se sumou a Deputación de Ourense”. O mandatario provincial explicou que “xuntos acudimos ao Valedor do Pobo para elaborar, con un equipo de expertos, a documentación necesaria”. Campos Conde precisou que presentaron dita documentación á Dirección Xeral de Patrimonio Cultural, departamento responsable de elevar esta candidatura ao Ministerio de Cultura, quen o dirixirá á UNESCO. Patrimonio respondeu que era necesario facer modificacións, o equipo de expertos do Valedor respondeulle, solicitando colaboración, “pero pasou un ano e aínda nada se sabe, nin contactaron con ningunha administración”, precisou Campos Conde.•
