•Para crear ambiente de época, están convocados dous concursos de vestimenta irmandiña ou medieval, e decoración de balcóns e fachadas

• Sarria estreará un novo evento na fin de semana do 15, 16 e 17 de xullo. A I Festa Irmandiña recrea o asalto da Torre de Sarria, e a expulsión da vila do Conde de Lemos pola accións de centros de irmandiños que o perseguiron polas rúas sarriás ata botalo fóra. Con este marco histórico, Sarria voltará ao pasado durante tres días, nunha festa que arrincará o venres 15 ás oito da tarde no Concello, coa actuación dos Zanfoneiros da Tradescola.

ASENTAMENTO IRMANDIÑO NA PRAZA DA VILA, E ACTIVIDADES CON ANIMACIÓN NA RÚA NO CASCO VELLO
A ambientación será un elemento fundamental para recrear a atmósfera medieval, no Casco Vello e na Praza da Vila. Neste espazo, estará instalado o asentamento irmandiño, e ao longo da rúa Maior disporanse os postos de artesanía local. A denominada “eira dos nenos” situarase detrás de San Salvador, onde os máis cativos disfrutarán de xogos e actividades, e un pouco máis arriba instalaranse os obradoiros infantís. A animación dará vida ás rúas sarriás ao longo dos tres días, con música en vivo, teatralización, zancudos, espectáculos de lume e bufóns.
Dende o Concello de Sarria están a organizar diversos concursos de ambientación de época medieval, para animar á participación da veciñanza, e rescatar a atmósfera irmandiña do Medievo.

DECORACIÓN DE BALCÓNS E FACHADAS DA ZONA VELLA
Por unha banda, anímase á veciñanza a decorar balcóns e fachadas con elementos de época, a través da convocatoria dun concurso. O ámbito de participación será a zona vella, e será necesario inscribirse previamente no Concello. Como requisito imprescindible, os elementos decorativos deberán evocar a época medieval ou irmandiña, e só poderá aplicarse a fachadas e balcóns, nunca a baixos, a un mínimo de 2,50 metros do chan, por razóns de seguridade. O xurado do premio, integrado por persoas con coñecementos históricos, criterios artísticos e de estética urbana, valorarán nos traballos a súa creatividade, o deseño, os elementos irmandiños, o rigor histórico e a relación estética do edificio cos ornamentos empregados.
O fallo do xurado farase público o domingo 17 de xullo, ás 20 horas, dende o balcón do Concello. Haberá tres premios, en forma de vales canxeables por valor de 200, 150 e 100 euros, que se poderán gastar no establecemento correspondente antes do 31 de decembro de 2016.

TRAXES DE ÉPOCA CON PREMIOS PARA ADULTOS E INFANTIL
Ademais, o Concello invita á veciñanza de todas as idades a participar nos actos da I Festa Irmandiña de Sarria, que se irán anunciando progresivamente no Facebook www.facebook.com/Sarria Irmandiña, e www.facebook.com/Festa Irmandiña de Sarria, así como no Facebook do Concello e na páxina www.sarria.es. O mellor xeito de sumarse á festa é ir vestidos de época, e poder optar tamén aos premios deste concurso. Para participar, haberá que achegarse o sábado e o domingo ás 13 horas ata o Concello, onde se entregará un número por traxe para o sorteo de diversos vales, canxeables nos establecementos colaboradores. Ademais, haberá un premio en metálico para o mellor traxe. O sorteo da categoría infantil será o domingo ás 20 horas.

CEA IRMANDIÑA PREVIA INSCRICIÓN
A Cea Irmandiña desenvolverase na Praza Juan María López, ao lado de Santa Mariña, o sábado 16 de xullo a partir das 22 horas. O menú está composto de mexillóns, zamburiñas, asado de tenreira, tarta de Santiago, café e bebida. A cea contará con música, bufón, espectáculo e sorteos. Hai que inscribirse antes do 12 de xullo no Concello, na Casa da Cultura ou no enderezo xemacomunicacion@mundo-r.com.

RECREACIÓN HISTÓRICA DO ASALTO IRMANDIÑO Á TORRE
O eixo temático da I Festa Irmandiña ten que ver coa persecución do Conde de Lemos polos irmandiños, e a toma e destrución da Torre, símbolo do poder feudal. Por este motivo, a dramatización deste momento histórico ocupa un lugar central nas celebracións, con dúas sesións ás 12 e ás 20,30 horas, tanto o sábado como o domingo. Os irmandiños serán recreados por membros dos colectivos e asociacións da vila de Sarria.•